Երեւանի քաղաքապետարանը պնդում է, որ Նորքի 1-ին զանգված Բաղյան փողոցում ծառեր չեն հատվել:

Քաղաքապետարանի մամուլի ծառայության տարածած հաղորդագրության մեջ նշվում է.

«Փետրվարի 23-ին համացանցային որոշ կայքերի տարածած  ապատեղեկատվության վերաբերյալ հարկ ենք համարում տեղեկացնել, որ Բաղյան փողոցին հարող տարածքում  /143 դպրոցի հարակից տարածք/ 350-400 հատ ծառերից  կազմված կանաչ տնկարկ /գոտի/ երբեւէ չի եղել։ 

Երեւանի քաղաքապետարանի եւ Նոր Նորք վարչական շրջանի մասնագետների կողմից  ուսումնասիրվել է նշված տարածքը: Ուսումնասիրության արդյունքում պարզվել է, որ.

-Տարածքն իրենից կանաչ գոտի չի ներկայացնում: Ավելին, նշված տեղանքում մասսայական ծառահատումների կամ ծառահատումները վերացնելու որեւէ հետք կամ նշաններ չեն հայտնաբերվել,

-Տարածքը սեփական տարածք է, որտեղ ուսումնասիրության արդյունքում հայտնաբերվել է ընդամենը  անկանոն աճած 3 հատ հատված ծառի կոճղ»: