նախընտրելի դարձնելԵրեւանի ավագանու ընտրություններին դիտորդական առաքելություն իրականացնելու համար դիմել է երկու տեղական հասարակական կազմակերպություն` «Ընտրական համակարգեր կենտրոն»` 60 դիտորդ եւ «Իրավակիրթ հասարակություն»` 50 դիտորդ: NEWS.am-ի թղթակցի հետ զրույցում ԿԸՀ մամուլի քարտուղար Հերմինե Հարությունյանն ասաց, որ դեռ ոչ մի միջազգային կազմակերպություն չի դիմել: Կազմակերպությունները կարող են հայտ ներկայացնել մինչեւ քվեարկությունից տասը օր առաջ:
Նա տեղեկացրեց, որ ապրիլի 1-ին ԿԸՀ արտահերթ նիստ կհրավիրի, կքննարկեն Հանրային հեռուստատեսությամբ եւ ռադիոյով անվճար եւ վճարովի եթերաժամի բաշխման կարգը եւ ժամանակացույցը:
Հիշեցնենք, որ Երեւանի ավագանու ընտրություններին մասնակցելու համար 6 կուսակցություն եւ մեկ դաշինք է առաջադրվել` ՀՀԿ-ն, ԲՀԿ-ն, ՕԵԿ-ը, ՀԱԿ-ը, «Առաքելությունը», ՀՅԴ-ն եւ «Բարեւ, Երեւան» դաշինքը: Կենտրոնական ընտրական հանձնաժողովը գրանցել է Երեւանի ավագանու ընտրություններին առաջադրված 6 կուսակցությունների եւ մեկ դաշինքի ներկայացրած համամասնական ցուցակները:
Նշենք, որ Երեւանի ավագանու ընտրությունները տեղի կունենան մայիսի 5-ին, որտեղ քաղաքական ուժերը կպայքարեն Երեւանի ավագանու 65 տեղի համար: Նախընտրական քարոզչությունը կսկսվի ապրիլի 7-ին եւ կավարտվի մայիսի 3-ին: Երեւանի ավագանու ընտրությունները տեղի կունենան բացառապես համամասնական ընտրակարգով մայիսի 5-ին:
