նախընտրելի դարձնելՀայաստանի նախագահ Սերժ Սարգսյանը շնորհավորել է ասորական համայնքին՝ Հաբ-Նիսանի առթիվ:
Շնորհավորանքում ասվում է.
«Հայաստանի ասորական համայնքի հարգելի՛ ներկայացուցիչներ,
Ջերմորեն շնորհավորում եմ ձեզ ասորական Նոր տարվա` Հաբ-Նիսանի կապակցությամբ: Չեմ կասկածում, որ դուք այս գեղեցիկ տոնը նշելու եք արժանի շուքով եւ հանդիսավորությամբ` պահպանելով հավատարմությունը ձեր ազգային ավանդույթներին:
Հայ եւ ասորի ժողովուրդների դրացիությունն ու բարեկամությունը, համագործակցությունն ու մշակութային փոխհարստացումը դարերի պատմություն ունեն: Հայաստանի բոլոր քաղաքացիներին, այդ թվում` հայերի եւ ասորիների ներկա սերնդին բախտ ու պատիվ է վիճակվել շարունակել ու նորովի զարգացնել այդ ավանդույթները:
Սիրելի՛ հայրենակիցներ,
Շնորհավորելով բնության զարթոնքը խորհրդանշող այս տոնի առթիվ` մաղթում եմ ձեզ, որ նոր տարում բազմապատկվեն ձեր հաջողությունները: Վստահ եղեք, որ մեր ընդհանուր հայրենիքը շատ ավելի ուժեղ է ձեզնով եւ ձեր հաջողություններով»:
