նախընտրելի դարձնելՎերահսկիչ պալատի նախագահ Իշխան Զաքարյանը պաշտոնական այցով մեկնել է Գերմանիա:
ՎՊ լրատվական ծառայությունից հայտնում են, թե Բոնում Իշխան Զաքարյանին ընդունել է Գերմանիայի Դաշնային Հանրապետության Բարձրագույն Վերահսկիչ պալատի նախագահ դոկտոր Դիտեր Էնգելսը, ով ղեկավարում է Գերմանիայի արտաքին պետական վերահսկողական ողջ համակարգը:
Իշխան Զաքարյանն ու Դիտեր Էնգելսը ստորագրել են համագործակցության համաձայնագիր, որը ենթադրում է փորձի փոխանակում, համատեղ ստուգումներ եւ ուսումնասիրություններ: Առաջիկա տարիներին համագործակցությունն ուղղված է լինելու, մասնավորապես, շինարարության եւ պետական գնումների համակարգի ուսումնասիրմանն ու վերլուծմանը:
Կողմերը նշել են, որ վերահսկողության ոլորտում հայ-գերմանական հարաբերությունները զարգանում են բավականին կայուն եւ ժամանակն է` համագործակցությունն ավելի խորացնելու եւ ընդլայնելու:
Ի. Զաքարյանի ղեկավարած պատվիրակությունը հունիսի 26-ին կմեկնի Հեսսենի երկրամաս, որտեղ գերմանացի գործընկերների հետ կքննարկվեն ճանապարհաշինության վերահսկողության ոլորտում ժամանակակից տեխնոլոգիաների ու չափագրման մեթոդների կիրառման խնդիրները:
Այցի ընթացքում ՀՀ վերահսկիչ պալատի պատվիրակությանն ուղեկցում են Գերմանիայի տնտեսական համագործակցության գրասենյակի ներկայացուցիչները:
