Հուլիսի 7-ի երեկոյան Աթենքի քաղաքապետ Յորղոս Կամինիսը հարձակման է ենթարկվել: Կամինիսին տեղափոխել են հիվանդանոց, նա լուրջ վնասվածքներ չունի: 

Agence France-Presse-ը, վկայակոչելով Հունաստանի մայրաքաղաքի քաղաքապետի մամուլի ծառայությանը, հայտնում է, որ  անհայտ անձինք հարձակվել էին Կամինիսի վրա, երբ նա փողոց էր դուրս եկել հունական այլ քաղաքների քաղաքապետերի հետ բանակցություններից հետո: Ekathimerini-ն հայտնում է, որ պաշտոնյաները հավաքվել էին Աթենքի հունական քաղաքապետարանների միության շենքում` քաղաքապետարանի աշխատակիցների կրճատման վերաբերյալ կառավարության կողմից հաստատված միջոցները քննարկելու նպատակով:  Հանդիպման ընթացքում Կամինիսը սատարել էր կառավարությանը: 

Միեւնույն ժամանակ, շենքի մոտ տեղի էր ունենում քաղաքապետարանի աշխատակիցների արհմիության անդամների ցույցը, որոնք բողոքում էին պետաշխատողների կրճատումների դեմ, գրում է  lenta.ru-ն: Քաղաքի իշխանությունները   հարձակման մեջ մեղադրել են ցուցարարներին: Արհմիության անդամներն էլ իրենց հերթին  հարձակումը սադրանք են անվանել: