Երեւանի քաղաքապետարանը պետք է ազատ քննարկման ընթացքում ապացուցի քաղաքային տրանսպորտի վերաբերյալ իր դրույթները։ Այս մասին հոկտեմբերի 25-ին լրագրողներին հայտնել է տնտեսագետ Դավիթ Գեւորգյանը՝ մեկնաբանելով տրանսպորտի ուղեվարձի թանկացման հարցը։

Նա հիշեցրել է, որ սեփական հանձնաժողովն է հիմնել, որում կարող են հանդես  գալ բոլոր ցանկացողները։ «Երեւանի քաղաքապետարանի հանձնաժողովում 30 մարդ կա, որոնցից 23-ը՝ ՀՀԿ անդամ։ Մենք՝ ակտիվիստներս, 2-3 հոգի ենք։ Ո՞վ մեր ձայնը հաշվի կառնի», – ասել է Գեւորգյանը։

Նրա խոսքով՝ ներկայիս 100 դրամ սակագինը նորմալ է եւ հնարավորություն տալիս է  ժամանակին նորացնել ավտոպարկը։ «Այս սակագնով կարելի է քիչ թե շատ նոր մեքենաներով երթեւեկել, այլ ոչ թե 15 տարվա  «Գազելներով»», – հավելել է Գեւորգյանը։

Հիշեցնենք, Տրանսպորտային սակագնի քննարկման հաձնաժողովը Երեւանի քաղաքապետարանը ստեղծել է տրանսպորտի ուղեվարձը 100-ից 150 դրամ դարձնելու հուլիսյան անհաջող փորձից հետո։

Որոշման գործողությունը կասեցվել է՝ մինչեւ սեպտեմբերից աշխատանքն սկսած հանձնաժողովի եզրակացությունը։ Հանձնաժողովում ընդգրկված են տրանսպորտային ընկերություններ, ՀԿ-ներ եւ Պետկառույցներ։