նախընտրելի դարձնել
Փարիզի դատախազությունը շաբաթ գիշերը «Փարիզյան հրաձիգ» Աբդելհաքիմ Դեքարին պաշտոնական մեղադրանքներ է ներկայացրել` ֆրանսիական լրատվամիջոցների խմբագրությունների վրա հարձակվելու, ինչպես նաեւ Societe General բանկի գլխավոր գրասենյակի մոտ կրակոցների համար, հայտնում է «Ֆրանս Պրեսս» գործակալությունը:
Ըստ դատախազ Ֆրեդերիկ Մոլենի`Դեքարի ԴՆԹ-ն համընկել է հանցագործության վայրից վերցված նմուշներին: Բացի դրանից, քննիչները հայտնաբերել են չարագործի չուղարկված նամակները, որոնցում նա մերժում էր կապիտալիստական համակարգը` դրան մեղադրելով «ֆաշիզմը լրատվամիջոցներ, բանկեր վերադարձնելու խադավանքի մեջ», հաղորդում է «ՌԻԱ Նովոստին»:
Երկուշաբթի առավոտյան անհայտ տղամարդը ներխուժել էր Liberation թերթի խմբագրություն եւ կրակել այնտեղ գտնվող մարդկանց վրա, որի հետեւանքով ծանր վիրավորվել էր լուսանկարչի ասիստենտը: Որոշ ժամանակ անց այդ նույն անձը կրակ էր բացել Փարիզի Դեֆանս արվարձանի Societe General բանկի գլխավոր գրասենյակի մոտ: Դրանից հետո չարագործը պատանդ էր վերցրել մի վարորդի եւ վերջինիս մեքենայով ուղեւորվել Ելիսեյան դաշտեր: Հետո պատանդն ազատ էր արձակվել: Անցյալ ուրբաթ զինված տղամարդը ներխուժել էր BFMTV հեռուստաալիքի գրասենյակ, սակայն չէր կրակել, այլ միայն սպառնացել էր լրագրողներին եւ փախել:
