նախընտրելի դարձնելМոսկվայի բորսայում ապրիլի 28-ին ռուսական ռուբլու հերթական անկումն է գրանցվել: ԱՄՆ 1 դոլարի միջին փոխարժեքը աճել է 9,56 կոպեկով՝ 36,0245 ռուբլի:
Ռուսաստանցի փորձագետները ռուբլու կտրուկ թուլացումը կապում են Ուկրաինայի դեպքերի հետ: Ըստ նրանց՝ վերջին ժամանակներս երկրից կապիտալի փախուստը հանգեցրել է դոլարի եւ մասամբ եվրոյի պահանջարկի աճին: ՌԴ ֆինանսների նախարարությունը կապիտալի արտահոսքը տարեկան պլանում գնահատել է 70-80 մլրդ դոլար, տնտեսական զարգացման նախարարությունը՝ 100 մլրդ դոլար: Անկախ փորձագետներն ավելի բարձր ցուցանիշներ են նշում:
Ռուսաստանցի փորձագետների կարծիքով՝ կապիտալի արտահոսքը շատ առումներով հիշեցնում է 2008թ. IV եռամսյակի վիճակը, երբ դոլարի փոխարժեքը հասել էր 27,26 ռուբլու՝ նախորդ եռամսյակի 24,24 ռուբլու փոխարեն: Ռուսաստանում այն ժամանակվա ճգնաժամը Հայաստանում 2009թ. ռուսական դրամական փոխանցումների կտրուկ անկման հանգեցրեց՝ բացասաբար անդրադառնալով մեր տնտեսության վրա:
Տարբեր տեսակետներ կան երկրի տնտեսության վրա արտաքին դրամական փոխանցումների ազդեցության վերաբերյալ: Մի կողմից պնդում են, որ փոխանցված յուրաքանչյուր հավելյալ դոլարի դիմաց երկրի ՀՆԱ-ն երկարաժամկետ հեռանկարում աճում է 0,2 դոլարով:
Մյուս կողմից, հաշվի առնելով, որ փոխանցումների հիմնական մասը ծախսվում է ապրանքներ եւ ծառայություններ ձեռք բերելու վրա, այդ ազդեցությունն այնքան էլ ուժեղ չէ: Այլ հարց է, եթե տնային տնտեսություններն այդ ստացված գումարները ծախսեին, ասենք, անշարժ գույք ձեռք բերելու համար, որը դրական կարտահայտվեր ՀՆԱ-ի աճի վրա:
Բայց քանի որ մեզ մոտ փոխանցումներն ստացողները հիմնականում «աղքատ» են, այդ գումարների առյուծի բաժինը ծախսվում է ընթացիկ նպատակների վրա: Սակայն, անկախ ծախսերի ուղղվածությունից, անհատական փոխանցումները հիմնականում կանխորոշում են մեր տնտեսության զարգացումը: Եվ շատերը հարց են տալիս` ի՞նչ կարելի է սպասել այդ բնագավառում:
Ըստ ռուսական պետական գերատեսչությունների` փետրվարին տնտեսության մի շարք ոլորտներ լավ ցուցանիշներ են ունեցել, բացառությամբ` արտաքին առեւտրի շրջանառության, սննդամթերքի, տեքստիլի եւ հագուստի արտադրության: Շինարարությունում նույնպես աճ է գրանցվել:
Սակայն Ռուսաստանի տնտեսության ապագայի վերաբերյալ կանխատեսումներն այնքան էլ ուրախալի չեն: Շատերը կարծում են, որ ընթացիկ եռամսյակում երկրի տնտեսությանը ճգնաժամ է սպառնում: Ռուսաստանի համար ծագում են մի շարք խնդիրներ` Արեւմուտքի տնտեսական պատժամիջոցների, նավթի համաշխարհային գների հնարավոր անկման պատճառով: Այդ պայմաններում չի բացառվում զբաղվածության կրճատումը, աշխատավարձերի աճի սառեցումը կամ դանդաղումը:
Այդպիսով, Հայաստան «ռուսական» փոխանցումների հոսքի վրա կազդի միանգամից երկու հիմնական գործոն: Դրանցից մեկը կապված է Ռուսաստանի տնտեսության ընդհանուր վիճակի հետ (այդ թվում նաեւ` ռուբլու փոխարժեքի), երկրորդը` աշխատանքային միգրանտների համար օրենքների խստացման հետ:
