նախընտրելի դարձնելԱռաջին անգամ Հայաստանում ոչ իշխանական կուսակցությունների կողմից առաջ քաշվեց ոչ թե քաղաքական, այլ սոցիալական օրակարգ: Այս մասին այսօր՝ հոկտեմբերի 6-ին, Վանաձորում կայացած ոչ իշխանական եռյակի մարզային իրազեկման հանրահավաքին ասաց ԲՀԿ-ական պատգամավոր Տիգրան Ուրիխանյանը:
«Ընդամենը մեկ խնդիր կա, որ ես այսօր մատնանշելու եմ, որի համար մենք սկսեցին այս արշավը, որի համար հավաքվելու ենք հոկտեմբերի 10-ին մայրաքաղաքում: Դա դրսեւորումն է արդեն ճգնաժամային մակարդակի հասնող գործազրկության, 40 տոկոսի հասնող աղքատության, տուգանքային ռեկետի: Դա դրսեւորումն է անտարբերության եւ արհամարհանքի մեր երկրի քաղաքացու նկատմամբ»,-ասաց Տիգրան Ուրիխանյանը:
Նրա խոսքով՝ իր ներկայացրած խնդիրները ստիպեցին ոչ իշխանական երեք քաղաքական ուժերին ուս-ուսի տված այն վերածել քաղաքական օրակարգի, որովհետեւ այլ տարբերակ իշխանությունները չթողեցին:
Ուրիխանյանը հավաքվածներին խնդրեց, որ հանրահավաքը անցնի հարց ու պատասխանի ձեւով, որպեսզի իրենք կարողանան հասկանալ քաղաքացիների մտահոգությունները:
Նշենք, որ հանրահավաքը տեղի է ունենում Վանաձորի «Հայք» հրապարակում: Հանրահավաքին մասնակցում են մի քանի հարյուր վանաձորցիներ:
