նախընտրելի դարձնել
ՀՀ Կառավարությունը երկրի առաջին նախագահ Լեւոն Տեր-Պետրոսյանին ցմահ աշխատանքային իրավասություններ կշնորհի։ «ՀՀ նախագահի վարձատրության, սպասարկման եւ անվտանգության ապահովման մասին» օրենքում համապատասխան փոփոխություններ մտցնելու օրինագիծը հավանության է արժանացել փետրվարի 5-ին կայացած Կառավարության նիստում։
Կառավարության աշխատակազմի ղեկավար նախարար Դավիթ Հարությունյանը հայտարարել է. «Մենք հայտնաբերեցինք, որ ժամանակին, երբ օրենքը մշակել էինք պաշտոնաթող նախագահի մասին, կային սահմանափակումներ, որոնք այն ժամանակ բնական էին, բայց կյանքը այնպիսին է, որ մարդը յոթանասուն տարեկանում շարունակում է գործել, ինչը ենթադրում է նաեւ որոշակի երաշխիքներ: Առաջին հերթին խոսքը գրասենյակին է վերաբերվում: Օրենքով նախատեսված է, որ պաշտոնաթող նախագահին գրասենյակ տրամադրվում է իր ցանկությամբ, բայց մինչեւ յոթանասուն տարեկան լրանալը: Սահմանափակումը հանում ենք, պաշտոնաթող նախագահի ընտրությամբ գրասենյակը տրամադրում ենք ցկյանս»,- ասաց նա՝ հավելելով, որ պաշտոնաթող նախագահի կենսաթոշակը պետք է գործող նախագահի աշխատավարձի ութսուն տոկոսը կազմի:
