Human Rights Watch իրավապաշտպան կազմակերպությունը պատրաստել է հատուկ ուղեցույց այն լրագրողների համար, ովքեր պատրաստվում են լուսաբանել Բաքվում կայանալիք Եվրոպական խաղերը։

«Ազատություն» ռադիոկայանի փոխանցմամբ, այդ միջոցառմանը մասնակցելու են մոտ 6 հազար մարզիկներ 50 երկրներից։ Խաղերը լուսաբանելու է շուրջ 700 արտասահմանցի եւ 600 տեղացի լրագրող։

Human Rights Watch-ը ցանկանում է բացատրել լրագրողներին, թե ինչ կարգի երկիր է Ադրբեջանը։ Ուղեցույցում կան տեղեկություններ այդ երկրի քաղաքական, տնտեսական եւ, իհարկե, մարդու իավունքների պաշտպանության ու ազատությունների բնագավառներում ստեղծված վիճակի մասին։

«Ադրբեջանի կառավարությունը ողջունում է մարզական միջոցառման մասնակցելու համար ժամանող եվրոպացիներին եւ միեւնույն ժամանակ առավել քան երբեւէ հալածում է ընդդիմադիրներին ու այլախոհներին», - ասել է Human Rights Watch-ի Եվրոպայի եւ Կենտրոնական Ասիայի գրասենյակի տնօրեն Ջեյն Բաչանանը եւ ավելացրել. - «Այդ խաղերը «պատմական» են դառնում հենց կառավարության վարած հալածանքների քաղաքականության տեսակետից, եւ շատ կարեւոր է, որ լրագրողները տեսնեն ամբողջական պատկերը»։

Ըստ Human Rights Watch-ի ուղեցույցի, այդ ամբողջական պատկերը ներառում է անկախ խմբավորումների նկատմամբ իշխանության կիրառած «դրակոնյան» օրենքները, հանրային բողոքները ամենակոշտ միջոցներով լռեցնելու գործելակերպը, բռնությունները ոստիկանության բաժանմունքներում եւ ռեժիմի կողմից քաղաքացիների հետապնդումները։

Ուղեցույցում ասվում է, որ 2014 թվականից սկսած Ադրբեջանի կառավարությունն իրականացնում է այլախոհների դեմ աննախադեպ լայնածավալ արշավ։ Այսօրվա դրությամբ առնվազն 35 լրագրողներ, իրավապաշտպաններ եւ քաղաքական ակտիվիստներ գտնվում են ադրբեջանական բանտերում։

Մամուլի ազատությունը ոտնահարված է։ 2009 թվականից սկսած փակվել են միջազգային մի շարք ռադիոկայաններ, ինչպես նաեւ ընդդիմադիր եւ անկախ լրատվամիջոցներ։ Այս ամենը արտացոլվել է նաեւ Freedom House-ի Մամուլի ազատության 2015 թվականի ցուցիչում, որի համաձայն՝ Ադրբեջանում մամուլի գործունեության պայմաններն անցած տարում է՛լ ավելի են վատթարացել։

Մամուլի ազատության անկում է ամբողջ աշխարհում, սակայն Ադրբեջանը գտնվում է մեկ տարում առավել շեշտակի եւ վտանգավոր հետընթաց գրանցած երկրների թվում։

Նշենք, որ Բաքվում Եվրոպական խաղերը տեղի կունենան հունիսի 12-28-ը։

Առավել մանրամասն սկզբնաղբյուր կայքում