նախընտրելի դարձնելԹուրքիան բավական վախեցած է իր դեմ ներկայացված հայցից: Այս մասին օգոստոսի 3-ին լրագրողների հետ հանդիպման ժամանակ հայտարարեց թուրքագետ Արտակ Շաքարյանը` անդրադառնալով Լոս Անջելեսում բնակվող ամերիկահպատակ Կարպիս Դավոյանի ու Հրայր Թուրաբյանի` թուրքական կառավարության դեմ ներկայացված հայցին: Շաքարյանի խոսքով` թուրք վերլուծաբաններն այժմ փորձում են հուսադրել թուրք հասարակությանը, որ հայցը ընդամենը քաղաքական ուղղվածություն ունի, զուրկ է իրավական հիմքից եւ ԱՄՆ-ը չի կարող Թուրքիային դատի տալ:
«Թուրքերը պատրաստված չէին սրան, թուրքերը նոր են սկսում ուսումնասիրել այս հայցը: Նրանց արձագանքներից պարզ է դառնում, որ նրանք չէին պատկերացնում, որ հայերը կարող են հատուցումն այդ մեթոդով պահանջել ու հատկապես Թուրքիայի պետությանն ուղղված հայցով»,-նշեց թուրքագետը: Նա նաեւ հավելեց, թե հայերս սովորաբար կարծում ենք, որ թուրքերը շատ խելոք են, որ թուրքական դիվանագիոտթյունն ամեն ինչ հաշվարկում է նախապես, մինչդեռ նշված հայցը վկայում է, որ իրականությունը բոլորովին այլ է: «Թուրքիան մինչեւ ուսումնասիրի այդ հայցը` նվազագույնը վեց ամսից մինչեւ մեկ տարի կանցնի»,-նկատեց Շաքարյանը:
Հիշեցնենք, որ վերջերս Լոս Անջելեսում բնակվող ամերիկահպատակ Կարպիս Դավոյանն ու Հրայր Թուրաբյանը հայց են ներկայացրել թուրքական կառավարության դեմ` պահանջելով միլիարդների հասնող փոխհատուցում Թուրքիայից 1915-ին հայերից առգրավված շարժական եւ անշարժ գույքի, ինչպես նաեւ բանկային ավանդների դիմաց:
