Նախընտրելի
Հայաստանի Հանրապետության եւ Չեխիայի Հանրապետության աշխատանքի եւ սոցիալական հարցերի նախարարներն այսօր այցելեցին Հայոց Ցեղասպանության հուշահամալիր:
Նախարարներ Արտեմ Ասատրյանը եւ Միխաելա Մարքսովան ծաղիկներ դրեցին Հայոց ցեղասպանության զոհերի հիշատակը հավերժացնող անմար կրակի մոտ եւ մեկ րոպե լռությամբ հարգեցին անմեղ զոհերի հիշատակը:
Այնուհետեւ նախարարներն շրջեցին Հայոց Ցեղասպանության թանգարանում, որտեղ ծանոթացան նոր մշտական ցուցադրությանը՝ հազարավոր նորահայտ նյութերին, բնօրինակ եւ եզակի լուսանկարներին, գրքերին եւ փաստաթղթերին:
«Տեղեկատվությունը, լուսանկարները, տեսանյութերը, որոնք ներկայացված են թանգարանում, ավելի առարկայական են դարձնում 100 տարի առաջ տեղի ունեցած ոճրագործությունը: Կարծում եմ, Չեխիայի Հանրապետության աշխատանքի եւ սոցիալական հարցերի նախարարի այցը Հայաստան, մասնավորապես` Հայոց ցեղասպանության հուշահամալիր եւ թանգարան, կնպաստի հետագայում Չեխիայի Հանրապետության կողմից Ցեղասպանության ճանաչմանը»,-թանգարանային այցից հետո նշեց նախարար Արտեմ Ասատրյանը:
Շրջայցի ավարտին Չեխիայի Հանրապետության աշխատանքի եւ սոցիալական հարցերի նախարարը գրառում կատարեց Պատվավոր հյուրերի մատյանում:
