նախընտրելի դարձնել
Ընթացիկ տարվա սեպտեմբերի պետբյուջեի հարկային հավաքագրումներում նախորդող ամիսների բացասական միտումները շարունակվել են: Հարկերի աճն ինքնին զուտ խորհրդանշական է եղել՝ կազմելով 0.3%: Սակայն իրականում ամեն ինչ ավելի վատ է, քան կարելի էր ենթադրել այդ ցուցանիշից:
Ավելի վաղ նշվել էր, որ ընդհանուր իրավիճակը շտկում է (իսկ ավելի շուտ՝ թաքցնում այդ ոլորտում իրական պատկերը) նոր հարկատեսակը՝ թիրախային սոցիալական վճարը: Հիշեցնենք, որ այս հարկատեսակը պարտադիր սկզբունքով վճարում են պետական հատվածի աշխատակիցները: Առանց հաշվի առնելու այդ վճարումները՝ սեպտեմբերին հավաքագրված հարկերի ընդհանուր գումարը շուրջ 0.6 մլրդ դրամով կամ 0.6%-ով նվազել է:
Այս բացասական տեղաշարժը հիմնականում կապված է ԱԱՀ-ի հավաքագրման՝ 3.1 մլրդ դրամով (կամ 7.9%-ով) կրճատմամբ, ինչպես նաեւ եկամտահարկի հավաքագրման՝ ավելի քան 2.6 մլրդ դրամով (22.7%) կրճատմամբ: Արդյունքում հարկային եկամուտների գծով ընդհանուր տեմպը համեմատաբար դանդաղել է՝ ԱԱՀ-ի պատճառով 3.3%-ով եւ եկամտահարկի պատճառով՝ 2.8%-ով: Այս անկումը մասամբ փոխհատուցվել է բնական ռեսուրսների օգտագործման եւ բնապահպանական վճարների վճարումների աճով, ինչպես նաեւ շահութահարկի եւ մաքսատուրքի շնորհիվ:
ԱԱՀ-ի մուտքերում առաջատար է ապրանքների ներմուծումը, որից հավաքագրումները հունվար-սեպտեմբերին կրճատվել են 856.5 մլն դրամով կամ ավելի քան մեկ քառորդով (26.6%): Ընդ որում, ամենամեծ անկումը՝ բացի թանկարժեք մետաղներից եւ քարերից, գրանցվել է մեքենաների եւ մեխանիզմների, տրանսպորտային միջոցների մասով: Օրինակ՝ պետբյուջեի համար ԱԱՀ-ի մեկ այլ կարեւոր աղբյուրը՝ թեթեւ մարդատար ավտոմեքենաների ներկրումը, հունվար-հունիսին կրճատվել է ավելի քան 50%-ով:
