նախընտրելի դարձնել
Գերմանական ավտոարտադրող Mercedes-Benz-ն ԱՄՆ-ում մեղադրվում է նրա համար, որ իր մեքենաները գերազանցում են շրջակա միջավայր վնասակար արտանետումների առավելագույն թույլատրելի սահմանը, տեղեկացնում է Deutsche Welle-ն:
Հինգշաբթի ամերիկյան Իլլինոյսի նահանգի դատարան կոլեկտիվ հայց է ներկայացվել Mercedes-Benz-ի դեմ: Ինչպես նշված է հայցում, դիզելային շարժիչներով մեքենաների 14 մոդելում, որոնք BlueTec տեխնոլոգիան են օգտագործում, ազոտի օքսիդների արտանետումները բազմիցս գերազանցում են պաշտոնական փաստաթղթերում նշված ցուցանիշները:
Այն պնդումը, թե BlueTec տեխնոլոգիան դիզելային շարժիչների աշխարհում ամենամաքուրն է, «մոլորեցնում է եւ սուտ է», նշված է հայցում:
Պարբերականը նշում է, որ ԱՄՆ-ում ազոտի օքսիդի արտանետումների թույլատրելի առավելագույն սահմանը գերազանցվել է 19 անգամ: Ավելին, շարժիչի` ըստ Ցելսիուսի 10 աստիճանից ցածր ջերմաստիճանի պայմաններում աշխատելու դեպքում նորման գերազանցվում է 65 անգամ:
Mercedes-Benz-ի ներկայացուցիչներն իրենց հերթին հայտնում են, որ հայցի համար ոչ մի հիմք չկա: Ընկերությունում ուսումնասիրում են փաստաթղթերը եւ պատրաստվում են դատարանում պաշտպանել իրենց դիրքորոշումը: Mercedes-Benz-ում պնդում են, որ ընկերությունը չի զբաղվում տվյալների մանիպուլյացիայով, իսկ մեքենաների բոլոր մոդելները համապատասխանում են սահմանված նորմերին:
