նախընտրելի դարձնել
Հայաստանի էներգետիկայի եւ բնական պաշարների նախարարությունը ռուսական «ՌՏ-Քիմկոմպոզիտ» ընկերությունից տեխնիկական առաջարկներ կստանա «Նաիրիտ» գործարանի վերաբերյալ: Այդ մասին մարտի 16-ին Հայաստանի խորհրդարանում կառավարական ժամի ընթացքում հայտնել է Հայաստանի էներգետիկայի եւ բնական պաշարների նախարար Լեւոն Յոլյանը:
«Մենք նրանց հետ բանակցություններ ենք վարում եւ մինչեւ ապրիլի 1-ը առաջարկներ ենք սպասում», - ասել է նախարարը: Նա հիշեցրել է, որ մարտի 12-ին նախարարի հրամանով աշխատանքային խումբ է ստեղծվել «Նաիրիտ» քիմիական գործարանի վիճակի ուսումնասիրման համար: Աշխատանքային խմբի կազմում գերատեսչության, գործարանի եւ Երեւանի ՋԷԿ-ի ներկայացուցիչներ են: Խումբը ղեկավարում է փոխնախարար Լեւոն Շահվերդյանը:
Հիշեցնենք, որ 2006-ին պետությունը «Նաիրիտ» ընկերության 90 տոկոսը 40 մլն դոլարով վաճառել էր բրիտանական «Rhinoville Property Limited» կոնսորցիումին: Այդ ժամանակվանից ընկերությունը գործնականում ոչ մի անգամ հանդես չի եկել հանրության կամ մամուլի առաջ: 2006-ին ԱՊՀ-ի Միջպետբանկը 70 մլն դոլարի «Rhinoville» վարկային գիծն է բացել, որն ընկերությունը չի փակել: 2014-ի հունվարին Մոսկվայի արբիտրաժային դատարանը բավարարել է Միջպետբանկի հայցը բաժնետոմսերի 90 տոկոսը պարտքի դիմաց բռնագանձելու վերաբերյալ: Մնացած 10 տոկոսը պատկանում է Հայաստանի կառավարությանը: Ձեռնարկությունը, որը համաշխարհային շուկաներում պահանջարկ ունեցող քլորոպրենային կաուչուկ է արտադրում, պարապուրդի է մատնված 2010-ի ապրիլից:
2015-ի հուլիսի 28-ին Հայաստանի այն ժամանակվա էներգետիկայի եւ բնական պաշարների նախարար Երվանդ Զախարյանը հայտնել է, ԱՊՀ-ի Միջպետբանկի հետ բանակցությունների արդյունքում վերջինս համաձայնել է Հայաստանի կառավարությանը զիջել գործարանից չբռնագանձված դեբիտորական պարտավորությունները եւ ծուտով կարող է օրինականորեն ստանձնել գործարանի ակտիվների մնացած 90 տոկոսի տիրապետումը:
