Թուրքիան մինչեւ հիմա չի կատարել Եվրամիության 72 պահանջներից 7-ը, որոնք պարտադիր պայման են Թուրքիայի քաղաքացիներին անվիզա ռեժիմ տրամադրելու համար։ Այս մասին ասել է ներքին գործերի, միգրացիայի եւ քաղաքացիության հարցերով եվրահանձնակատար Դիմիտրոս Ավրամոպուլոսը, փոխանցում է «ՌԻԱ Նովոստի»–ն։

Մայիսի սկզբին Եվրահանձնաժողովը Եվրախորհրդարանին եւ Եվրոպական խորհրդին առաջարկել էր հանել Թուրքիայի քաղաքացիների համար վիզային սահմանափակումները, եթե Անկարան մինչեւ հունիսի վերջը կատարի բոլոր պայմանները, դրանց թվում՝ կաշառակերության կանխման միջոցներ ձեռնարկի, Եվրոպոլի հետ օպերատիվ համաձայնության մասին բանակցություններ սկսի, դատական համագործակցության եւ ահաբեկչության դեմ պայքարի օրենսդրության փոփոխություններ իրականացնի։

Թուրքիայի նախագահ Ռեջեփ Թայիփ Էրդողանն ավելի վաղ արդեն սպառնացել էր ԵՄ–ին, որ կձախողի միգրացիոն գործարքը, եթե իր քաղաքացիներին անվիզա ռեժիմ չտրամադրեն, ինչպես նաեւ հայտնել էր, որ չի վերանայի հակաահաբեկչական օրենսդրությունը։ Դրան ի պատասխան՝ Եվրահանձնաժողովի նախագահ Ժան Կլոդ Յունկերը Թուրքիայի իշխանություններին կոչ  էր արել  հրաժարվել ահաբեկման քաղաքականությունից։