նախընտրելի դարձնել
Չինական G. Patton ընկերությունը, որն անվանվել է ամերիկյան գեներալ Ջորջ Փաթթոնի պատվին, վեց անիվանի Tomahawk է ներկայացրել: Նորույթը կառուցել են Jeep Wrangler-ի հիմքի վրա, հայտնում է Motor-ը:
Հետեւից «Ռենգլերին» բեռնահարթակ են ավելացրել կարծր վերնամասով, ինչպես նաեւ` երրորդ առանցքը: «Տոմահավքը» իր «դոնորից» տարբերվում է ամբողջությամբ փոփոխված դիմային հատվածով եւ Black Armor («Սեւ զրահ») անվանումով հատուկ գունավորմամբ:
Նորույթը 17 դյույմանոց ալյումինե անվային սկավառակներ է ստացել` Mickey Thompson-ի ամենագնացային անվադողերով` 35 դյույմ տրամագծով: Դիմացից տեղադրված է Warn Zero վերհան` հեռակառավարմամբ:
Բացի այդ, ամենագնացը զինել են էլեկտրալարով աշխատող հատուկ ոտնակներով, որոնք կոչված են հեշտացնել սրահում նստելը:
G. Patton Tomahawk-ը զինված է 3,6 լիտրանոց բենզինային V6 ագրեգատով, որին մեխանիկական ներմղիչ են ավելացրել, որը կառուցված է հատուկ պատվերով ստեղծված թողարկիչ համակարգով: Ուժային սարքի հզորությունը չի ճշտվում:
