Նախընտրելի
Միայն լայնամաստաբ ռազմական գործողության դեպքում է, որ Հայաստանը պետք է սկսի ԼՂՀ անկախության ճանաչման գործընթաց, իսկ մինչ այդ պետք է սպասի: Այս մասին դեկտեմբերի 9-ին լրագրողների հետ հանդիպման ժամանակ հայտարարեց քաղաքագետ Ստեփան Գրիգորյանը: Նա միաժամանակ հավելեց, որ քանի դեռ գործում է ԵԱՀԿ Մինսկի խումբը ու այդ կառույցի շրջանակներում ընթանում են ԼՂ հարցով բանակցություններ, ԼՂՀ ճանաչումը սխալ է:
«Ժառանգությունը» հետեւողականորեն գնում է այդ ճանապարհով՝ պահանջելով ԼՂՀ անկախության ճանաչում: Ուղղակի, եթե մենք ճանաչում ենք անկախությունը, դա ավտոմատ նշանակում է ողջ բանակցային պրոցեսի քանդում, դա նշանակում է անհարգալից վերաբերմունք համանախագահների նկատմամբ»,-հայտարարեց Գրիգորյանը: Նրա խոսքով՝ եթե Հայաստանը որոշի դեմ դուրս գալ Ռուսաստանին եւ ԱՄՆ-ին, կստանա նույն արդյունքը, ինչն ունեցավ անցյալ դարասկզբին Ղարսի պայմանագրի դեպքում:
«Ես իմ այս խոսքերի համար պատասխանատու եմ՝ եթե մենք այսպիսի քայլեր անենք, կունենք նույն իրավիճակը, ինչը եղավ Ղարսի դեպքում: Գիտեք, որ մենք ընդհանրապես Ղարսի հետ կապված պրոբլեմ չունեինք, պարզապես նման անմիտ քայլերը բերեցին նրան, որ Ղարսը կորցրեցինք» ,-հայտարարեց քաղաքագետը:
Հիշեցնենք, որ Աստանայում տեղի ունեցած ԵԱՀԿ գագաթաժողովում ՀՀ նախագահ Սերժ Սարգսյանը հայտարարել էր, որ եթե Ադրբեջանը շարունակի ռազմական ագրեսիան, ապա Հայաստնը կսկսի ԼՂ անկախությունը ճանաչելու գործընթաց:
