Շպիցբերգենի մոտ Մի-8 ուղղաթիռի կործանման առավել հավանական վարկած է համարվում օդաչուների ոչ ճիշտ գործողությունը: Այդ մասին հաղորդել են «Ինտերֆաքսի» աղբյուրները՝ ավիացիոն որոնողական  ու փրկարարական միջազգային ծառայություններից:

«Թռիչքի ընթացքում ուժեղ ձյունն ու քամին, օվկիանոսի կիսախավար մակերեւույթը կարող էին ազդել օդաչուների որոշումների վրա», - ասել է գործակալության զրուցակիցը:

Տեխնիկական անսարքության վարկածն, աղբյուրի խոսքով, նույնպես դիտարկվում է, բայց համարվում է քիչ հավանական: Ուղղաթիռը արտադրվել էր 2013-ին եւ ժամանակին տեխսպասարկում է անցել, պարզաբանել է նա:

Աղբյուրը չի բացառել, որ օդաչուները կարող էին բախվել  տարածական  զգացողության կորստյան կամ  հոգեկան այլ վիճակի, ինչը կհանգեցներ օդում  ոչ ճիշտ գործողությունների:

Ռուսական «Արկտիկուգոլ» ընկերության ուղղաթիռը կործանվել էր հոկտեմբերի 26-ին Շպիցբերգենի ափերի մոտ:

Պիրամիդա-Բարենցբուրգ երթուղով թռիչք իրականացնող ուղղաթիռում եղել է 8 մարդ՝ Արկտիկայի ու Անտարկտիկայի  ԳՀԻ  3 աշխատակից եւ անձնակազմի 5 անդամ: