Նախընտրելի
Քիչ առաջ հրդեհ էր բռնկվել Ավան վարչական շրջանում գտնվող «Ֆլեշ» նավթամթերքների բազայի տարածքում:
Ինչպես NEWS.am-ին հայտնեց ֆոտոլրագրող Գագիկ Շամշյանը, ժամը 12:09-ին ահազանգ է ստացվել Արտակարգ իրավիճակների նախարարության հրշեջ ծառայություն, որ Աճառյան 46/3 հասցեում գործող «Ֆլեշ» նավթամթերքի բազայի տարածքում հրդեհ է բռնկվել:
Կարճ ժամանակ անց հրդեհի վայր են ժամանել մի քանի հրշեջ ծառայությունների աշխատակիցներ` վեց մարտական հաշվարկով:
Դեպքի վայրում էին նաեւ Հայաստանի փրկարար ծառայության օպերատիվ խումբը` օպերատիվ վարչության պետ Արման Ցոլակյանի գլխավորությամբ: Դեպքի վայրում աշխատանքները ղեկավարում էր փրկարար ուժերի վարչության պետ, գեներալ-մայոր Վաչիկ Նիկողոսյանը:
Հրդեհաշիջման աշխատանքներում ներգրավվել էին նաեւ ԱԻՆ Հայաստանի փրկարար ծառայության Երեւանի փրկարարական վարչության աշխատակիցները` վարչության պետ Մուշեղ Ղազարյանի գլխավորությամբ:
Բարեբախտաբար զոհեր եւ վիրավորներ չկան, այրվում էր «ՄԱԶ» մակնիշի բենզատարը: Հրշեջները կարողացան կանխել հրդեհ հետագա տարածումը:
«Ֆլեշի» աշխատակիցները, հայհոյանքներ եւ սպառնալիքներ տալով, խոչընդոտում էին լրագրողի աշխատանքը` անգամ չէին թողնում որ նկարահանում կատարի արտակարգ իրավիճակների նախարարության լրատվական բաժնի աշխատակիցը:
Լուսանկարները եւ տեսանյութը` Գագիկ Շամշյանի
