նախընտրելի դարձնել
Ֆրանսիայի իշխանությունների տեղեկացմամբ՝ Ստրասբուրգից 25 կիլոմետր հեռու գտնվող Վեսթոֆեն կոմունայի հրեական գերեզմանատանը անհայտ անձինք պղծել են ավելի քան 100 գերեզման։ Ֆրանսիայի ներքին գործերի նախարար Քրիսթոֆ Քաստաներն «այդ զզվելի արարքներն» անվանել է «մեր հանրապետության արժեքների անարգում»։ Նրա խոսքով՝ ոստիկանությունն անում է ամեն ինչ մեղավորներին գտնելու համար։ Միջադեպի առիթով իր զայրույթն է հայտնել նաեւ Ֆրանսիայի վարչապետ Էդուար Ֆիլիպը, տեղեկացնում է «Նեմեցկայա վոլնա»-ն։
Պղծվել է 107 շիրիմ, դրանց վրա նկարվել են սվաստիկաներ, հակասեմական գրություններ։ Գերեզմանատանը մոտ 700 գերեզման կա։
Էլզասն արդեն մի քանի տարի բախվում է հակասեմության հողի վրա հանցագործությունների աճին. փետրվարին Կաթզենայմ կոմունայում, որը Ֆրանսիայի հյուսիս-արեւելքում է, անհայտ անձինք պղծել են մոտ 80 գերեզման հրեական գերեզմանատանը՝ դրանց վրա նացիստական խորհրդանշաններ պատկերելով։ Նախագահ Էմանուել Մակրոնը փետրվարի 19-ին այցելել է Կաթզենայմ, նույն օրը Ֆրանսիայի տարբեր քաղաքներում տեղի են ունեցել բողոքի ակցիաներ ընդդեմ հակասեմականության։
