նախընտրելի դարձնել
Ի պատիվ պաշտոնական այցով Սլովենիայում գտնվող Սերժ Սարգսյանի` այսօր` ապրիլի 13-ին Սլովենիայի նախագահ Դանիլո Թյիրկի անունից տրվել է պաշտոնական ճաշ, որի ժամանակ ՀՀ նախագահը բաժակաճառ է արտասանել:
Ստորեւ ներկայացնում ենք Սերժ Սարգսյանի բաժակաճառն ամբողջությամբ.
Մեծարգո՛ պարոն Նախագահ,
Հարգարժա՛ն տիկնա՛յք եւ պարոնա՛յք,
Խորապես զգացված եմ հայկական պատվիրակությանը ցուցաբերված ջերմ ընդունելության համար։ Այստեղ մենք ականատեսը դարձանք ոչ միայն Ձեր երկրի զարգացմանը եւ առաջընթացին, գեղատեսիլ վայրերին ու հարուստ բնությանը, այլեւ առիթ ունեցանք հաղորդակցվելու սլովեն ժողովրդի բարությանը, ջերմությանն ու աշխատասիրությանը:
Որպես Հայաստանի Հանրապետության Նախագահ, առաջին անգամ հյուրընկալվելով սլովենական հիասքանչ երկրում՝ ակամայից մտաբերեցի հայ-սլովենական միջպետական հարաբերությունների քսանամյա պատմությունը։ Անկեղծ ափսոսանք ապրեցի, որ բաց ենք թողել առաջին տասնամյակը եւ միաժամանակ՝ մեծ ուրախություն, որ երկրորդ տասնամյակը կարողացել ենք արդյունավետորեն ծառայեցնել մեր համագործակցությունը փոխշահավետ հիմքերի վրա զարգացնելու նպատակին։ Միայն այն փաստը, որ ընդամենը կես տարվա ընթացքում իմ գործընկերոջ հետ հանդիպում ենք արդեն երրորդ անգամ, վկայում է երկկողմ հարաբերությունները զարգացնելու փոխադարձ ձգտման մասին։
Մեծարգո՛ պարոն Նախագահ,
Հայերն ու սլովենացիներն ունեն շատ ընդհանրություններ: Պատմության ընթացքում մեր ժողովուրդներն անցել են բազմաթիվ դժվարությունների միջով, տեւական ժամանակ զրկված են եղել պետականությունից, եղել են տարբեր կայսրությունների եւ պետական միավորումների կազմում, սակայն կարողացել են պահպանել ազգային ինքնությունը, լեզուն ու մշակույթը, ինչն անկախ պետականության կայացման համար կարեւոր հիմք է:
20 տարվա անկախության պատմություն ունեցող մեր երկրները նոր արժեհամակարգի վրա են կերտում իրենց ապագան: Դա այն արժեքների համակարգն է, որ հնարավորություն է տալիս հասարակության յուրաքանչյուր անդամին ինքնարտահայտվելու եւ ինքնադրսեւորվելու, ազատ ընտրություն կատարելու, լիարժեք մասնակցելու պետության կառուցմանը, զբաղվելու ազատ ձեռնարկատիրությամբ: Մեր երկու պետություններն էլ իրենց արտաքին քաղաքականությունը կառուցում են Եվրոպայում անվտանգության եւ համագործակցության համակարգի ամրապնդման, խաղաղ գոյակցության եւ ինտեգրման գործընթացների առանցքում:
Ցավոք, Հայաստանի առջեւ ծառացած մարտահրավերները չեն սահմանափակվում միայն ներքին բարեփոխումներով: Հարավային Կովկասը առայժմ հեռու է միացյալ Եվրոպայի հիմքում ընկած առանցքային սկզբունքների` մարդկանց, կապիտալի, ապրանքների եւ ծառայությունների ազատ տեղաշարժի կիրառումից: Դա զգալիորեն նվազեցնում է տարածաշրջանային համագործակցության հնարավորությունները, ինչն իր հերթին ազդում է ավելի լայն առումով ինտեգրման գործընթացների վրա: Մեր ոչ բոլոր հարեւաններն են պատրաստ փոխադարձել մեր բարի կամքը եւ համագործակցություն ծավալել առանց նախապայմանների:
Հայաստանն առաջնորդվում է բարի կամքով: Մենք երբեք հետ չենք կանգնել մեր միջազգային պարտավորություններից եւ պատրաստ ենք շարունակելու բանակցությունները Մինսկի խմբի համանախագահությամբ եւ միջնորդությամբ, բացառապես խաղաղ ճանապարհով, միջազգային իրավունքի սկզբունքների հիման վրա, որ կապահովեն Լեռնային Ղարաբաղի ժողովրդի ազատ կամարտահայտությունն ու անվտանգությունը:
Տիկնա՛յք եւ պարոնա՛յք,
Կարճ ժամանակահատվածում վերակառուցված տնտեսության բարձր ցուցանիշները եւ արժանավայել կենսամակարդակն այսօր թույլ են տալիս խոսելու սլովենական ուղու մասին: Սլովենիայի օրինակը մեզ համար քաջալերող է թե՛ պետականաշինության, թե՛ տնտեսության զարգացման տեսակետից:
Հայաստանի ու Սլովենիայի միջեւ համագործակցության զարգացման համար ստեղծվել են լավ նախադրյալներ: Երկրների ղեկավարների միջեւ հաստատվել է կայուն քաղաքական երկխոսության եւ փոխըմբռնման մթնոլորտ: Կատարվել են առաջին անհրաժեշտ քայլերն առեւտրատնտեսական կապերն ակտիվացնելու ուղղությամբ:
Ցանկանում եմ առանձնացնել մշակութային, միջմարդկային շփումների առանցքային դերը մեր երկկողմ հարաբերություններում: Չէ՞ որ հենց ժողովուրդների միջեւ բարեկամությունն է, որ մնայուն արժեք է` անկախ քաղաքական ու տնտեսական վայրիվերումներից: Ինձ համար հաճելի էր տեղեկանալ, որ տարիներ շարունակ Սլովենիայի ֆիլհարմոնիկ նվագախումբը ղեկավարել է հայազգի Ջորջ Պեհլիվանյանը:
Ուրախ եմ նաեւ, որ անցյալ տարի Սլովենիայում հաջողությամբ անցկացվեց հայ մշակույթի փառատոնը։ Այժմ հերթը ձերն է: Մոտ ապագայում ակնկալում ենք սլովենական մշակույթը վայելել Հայաստանում:
Տիկնա՛յք եւ պարոնա՛յք,
Հայ-սլովենական բարեկամությանը ցանկանալով հարատեւություն` թույլ տվեք բաժակ բարձրացնել ի պատիվ Սլովենիայի Հանրապետության նախագահ պարոն Թյիրկի, հանուն մեր ժողովուրդների բարօրության եւ պետությունների բարգավաճման»:
