նախընտրելի դարձնելԱմերիկյան շրջանային դատավորն օգոստոսի 8-ին մերժել է Հայոց ցեղասպանության ժառանգների փոխհատուցման համար ստեղծված հիմնադրամի աուդիտի մասին միջնորդությունը` միաժամանակ կարգադրելով ադմինիստրատորին պարզաբանել վճարումների միջեւ եղած տարբերությունը: Այդ մասին հաղորդում է «Glendale News-Press»-ը:
Անկախ աուդիտի էր ձգտում փաստաբան Վարդգես Եղիայանը` իմանալով, որ ապահովագրական «Axa S.A.» ընկերության կողմից ստեղծված հիմնադրամում գրեթե 2,5 մլն ավելի գումար կա, քան ենթադրվում էր սկզբում:
Սակայն ամերիկյան շրջանային դատավոր Քրիստինա Սնայդերը նշել է, որ աուդիտը բավական երկար ժամանակ կպահանջի, եւ դրա անհրաժեշտությունը չկա, եթե Գլեդելում բնակվող հիմնադրամի ադմինիստրատոր Բարսեղ Գարդալյանը համապատասխան տեղեկատվություն ներկայացնի:
Գարդալյանն ընդամենը մի քանի շաբաթ ունի` կամովին մեկ սեղանի շուրջ նստելու փաստաբաններ Բրայան Կաբատեկի, Մարկ Գիրագոսի եւ Ռոման Զիլբերֆելդի հետ, որոնք ներկայացնում են Եղիայանի շահերը: Եթե Գարդալյանը չհամաձայնի կամովին հանդիպել նրանց հետ, ապա Զիլբերֆելդն ասել է, որ կխնդրեն դատավորին, որպեսզի նա ցուցմունքներ տա դատարանում:
Ըստ Զիլբերֆելդի` անդորրագրերում գումարները տատանվում են 159-ից մինչեւ 200 հազար դոլարի միջեւ: Հաշվետվությունները ցույց են տալիս, որ ժառանգներն ստացել են շատ անդորրագրեր, բայց նրանցից մի քանիսին կանխիկ գումար այդպես էլ չի վճարվել:
«Ինչու են մարդիկ ստացել շատ անդորրագրեր, եթե, տեսականորեն, մեկը բավարար է: Երեւում է, միայն մեկ մարդ կա, որը կարող է մեզ պատմել ինչու է դա այդպես, եւ դա պրն Գարդալյանն է»,-ասել է Զիլբերֆելդը:
Երեքշաբթի Գարդալյանը հեռախոսով ասել է, որ հանդիպման վերաբերյալ ոչ ոք իր հետ չի կապվել:
Նշենք, որ մի քանի տարի առաջ «New York Life Insurance» եւ «Axa» ընկերությունները պայմանավորվեցին ստեղծել առանձին հիմնադրամ` 37,5 մլն դոլար գումարով, որի միջոցով իրենք պետք է վճարեին 1875 եւ 1923թթ. ընկերություններում պոլիսներ ունեցած Հայոց ցեղասպանության զոհերի ժառանգներին:
Գիրագոսը, Կաբատեկը եւ Եղիայանը այդ կոլեկտիվ հայցի համատեղ փաստաբաններն էին:
Մոտ 100 անձի դեռ պետք է վճարեն հիմնադրամի միջոցներից, ասել է Կաբատեկը` նշելով, որ հենց ինքն ու Գիրագոսն են իմացել լրացուցիչ 2,5 մլն դոլարի մասին եւ գտել դեռեւս վճարում չստացած դիմումատուների:
