նախընտրելի դարձնելՀայաստանի վարչապետ Տիգրան Սարգսյանն այսօր` օգոստոսի 11-ին, կառավարության նիստի ավարտից անմիջապես հետո, ընդունել է «Ժառանգություն» խմբակցության պատգամավորներ Անահիտ Բախշյանին ու Արմեն Մարտիրոսյանին եւ քննարկել Երեւանում կրպակների ապամոնտաժման խնդիրը:
Կառավարության մամուլի ծառայությունից NEWS.am-ին հայտնում են, որ հանդիպման ընթացքում նշվել է, որ կառավարության այսօրվա նիտում քաղաքապետի կողմից տրվել են համապատասխան պարզաբանումներ առ այն, որ աշխատող կրպակների զանգվածային ապամոնտաժում չի լինելու:
Նշենք, որ կառավարության նիստի ընթացքում շեշտվել է, որ լինելու է անհատական մոտեցում, եւ կրպակներն ապամոնտաժվելու են միայն խիստ անհրաժեշտության դեպքում:
Կառավարության ղեկավարը հիշեցրել է, որ այն նամակներում, որ այսօր քաղաքացիներն ուղղում են կառավարություն, նշվում է, որ կրպակատերերից շատերն ունեն ստացած վարկեր, նրանցից մի քանիսը, լսելով վարչական շրջանի ղեկավարների հորդորները, վերանորոգել են իրենց կրպակները եւ այսօր եթե դրանք ապամոնտաժվեն, ապա նրանք կհայտնվեն ֆինանսական ծանր վիճակում:
Նիստի ընթացքում նշվել է, որ բոլոր այն կրպակատերերը, ովքեր ունեն մտահոգություն կամ անհանգստություն, պետք է դիմեն վարչական շրջանների ղեկավարներին, որոնց հստակ հանձնարարություն է տրվել` աշխատել բոլոր կրպակատերերի հետ` մայրաքաղաքում սոցիալական լարվածություն թույլ չտալու համար:
