նախընտրելի դարձնելՄի շարք վերլուծաբանների եւ Գալուստ Սահակյանի տեսակետը, թե «Ժառանգությունը» չի անցնի հաջորդ խորհրդարան, սովորական PR տեխնոլոգիա է, որով փորձում են հասարակության գիտակցության մեջ մտցնել, թե «Ժառանգությունը» չի լինելու հաջորդ խորհրդարանում: Այս մասին, հոկտեմբերի 6-ին, մամուլի ասուլիսում, հայտարարել է «Ժառանգություն» խմբակցության պատգամավոր Արմեն Մարտիրոսյանը, հավելելով, որ նորմալ է վերաբերում նման հայտարարություններին:
«Ոչինչ, 2007-ին նույնպես ասում էին, որ «Ժառանգությունը» չի հայտնվի խորհրդարանում, բայց մենք ցույց տվեցինք, թե որքան ձայների էր հավակնում կուսակցությունը եւ որքան ստացավ: Ցավոք, 2007-ին, իշխանությունների «ակտիվ աշխատանքի» հետեւանքով, «Ժառանգությանը» տվեցին իր ստացած ծայների 1/3-րդ մասը միայն: Մյուս կողմից, ուրախալի է, որ վերլուծաբաններն ու իշխող կուսակցությունն իրենց համար թիրախ են ընտրել «Ժառանգությունը», քանի որ քաղաքական դաշտում «Ժառանգությունը» միակ կուսակցությունն է, որն իրականացնում է բացառապես քաղաքական գործունեություն»,- նշել է Մարտիրոսյանը:
Մեկնաբանելով ՀՀԿ խմբակցության նախագահ Գալուստ Սահակյանի հայտարարությունը, թե «Ժառանգությունը» փոքր եւ անհասկանալի թիմ է, Մարտիրոսյանն ասել է. «Փոքրը ոչինչ. Ադամանդը եւս փոքր է, իսկ ահա քարածուխը իր չափսերով մեծ է լինում: Մյուս կողմից շատ լավ է, որ պարոն Սահակյանի համար «Ժառանգությունն» անհասկանալի է, քանի որ այդ դեպքում նրա համար շատ դժվար կլինի պայքարել «Ժառանգության» դեմ: Շատ ավելի կարեւոր է, որ «Ժառանգությունը» հասկանալի լինի հասարակ քաղաքացիներին»:
Ավելի վաղ NEWS.am-ը հայտնել էր, որ օրերս Գալուստ Սահակյանն ասուլիսում անդրադառնալով խնդրին, թե որ ուժերը կհայտնվեն հաջորդ խորհրդարանում, ասել է. «Բնական է, որ խորհրդարան կանցնի ՀՀԿ-ն, ԲՀԿ-ին, ՕԵԿ-ը, շանսեր ունի ՀՅԴ-ն: Ինչ վերաբերում է «Ժառանգությանը», այստեղ չի կարելի միանշանակ բան ասել: Ինձ համար դա փոքրիկ եւ անհասկանալի թիմ է: Հայ ազգային կոնգրեսը ունի ԱԺ-ում հայտնվելու որոշակի շանսեր: Այնպես որ խորհրդարանը կձեւավորվի եւ այնտեղ կլինեն ինչպես իշխանական, այնպես էլ ընդդիմադիր բլոկներ»:
