նախընտրելի դարձնելԼեհաստանում կալանավորվել է 19 մարդ, որոնք, կասկածվում են ռումբ պատրաստելու մեջ, հաղորդում է Associated Press-ը: Նշվում է, որ ձերբակալություններն իրականացվել են ողջ երկրով` Օսլոյում Բրեյվիկի կազմակերպած ահաբեկչությունից հետո իրականացվող արշավի շրջանակներում:
Հատուկ գործողության ընթացքում, խուզարկվել են ավելի քան 100 բնակարաններ, հայտնաբերվել է պայթուցիկի եւ քիմիական նյութերի զգալի քանակություն:
Քննության կարծիքով, կալանավորվածներից ոմանք հնարավոր է, կապ ունեն Նորվեգիայում տեղի ունեցած ահաբեկչությանը: Վարկածներից մեկի համաձայն, նորվեգացի ահաբեկիչ Բրեյվիկին օգնել են ռումբ պատրաստելու հարցում խորհուրդներ տալով, հաղորդում է RB-ն:
Ավելի վաղ NEWS.am-ը հայտնել էր, որ կրկնակի ահաբեկչությունը Նորվեգիայում տեղի էր ունեցել հուլիսի 22-ին։ Սկզբում պայթյուն էր տեղի ունեցել Օսլոյում` կառավարական շենքերի մոտ, իսկ մի քանի ժամ անց ոստիկանական համազգեստով տղամարդը գնդակոծության էր ենթարկել մայրաքաղաքից ոչ հեռու գտնվող Ուտոյա կղզում կառավարող Նորվեգական աշխատավորական կուսակցության երիտասարդական ճամբարը: Ողբերգությանը զոհ էր գնացել առնվազն 77 մարդ:
Ահաբեկիչը` 32-ամյա Անդերս Բրեյվիկը դատարանում հայտարարել էր, թե փորձել է փրկել Նորվեգիան: Ահաբեկչությունից առաջ նա համացանցում մանիֆեստ էր հրապարակել, որում դատապարտում էր բազմամշակութայնությունը եւ առաջարկում Եվրոպայից ոչ եվրոպացիների արտաքսման եւ իսլամի ճնշման իր պլանը: Նա հայտարարել էր, որ ունի Եվրոպայից, Հյուսիսային Ամերիկայից, Ավստրալիայից, Հարավային Աֆրիկայից, Հայաստանից, Իսրայելից եւ Հնդկաստանից կողմնակիցների` «մշակութային պահպանողականների» 8000 էլեկտրոնային հասցեներ:
