Դեկտեմբերի 15-ին Լեհաստանի ազգային պաշտպանության նախարար Վլադիսլավ Կոսինյակ-Կամիշը հայտարարել է, որ Սմոլենսկի աղետը հետաքննող հանձնաժողովը՝ Անտոնի Մացերևիչի գլխավորությամբ, լուծարվելու է, հայտնում է Polskie Radio պորտալը։

Հստակեցվում է, որ հանձնաժողովի անդամները պարտավոր են հաշվետվություն ներկայացնել մինչև դեկտեմբերի 18-ը։ Դեկտեմբերի 15-ից վերացվել են նաև հանձնաժողովի անդամների լիազորությունները, այդ թվում՝ թույլտվություններն ու լիազորագրերը՝ նրանց աշխատանքին առնչվող գործողություններ իրականացնելու համար։

Պաշտպանության նախարարությունը հայտարարել է, որ շուտով կստեղծվի հատուկ խումբ, որը կվերլուծի լուծարված մարմնի աշխատանքի բոլոր ասպեկտները։ Կարևոր է նշել, որ Սմոլենսկի աղետը հետաքննող հանձնաժողովը ստեղծվել է 2016 թվականին պաշտպանության նախարարության այն ժամանակվա ղեկավար Անտոնի Մացերևիչի կողմից՝ 2010 թվականին Սմոլենսկում տեղի ունեցած ավիավթարի պատճառները հետաքննելու համար, որի հետևանքով զոհվել էր նախագահ Լեխ Կաչինսկին, նրա կինը՝ Մարիան և ևս 94 հոգի։

2018-ին հանձնաժողովի ղեկավարը չեղյալ հայտարարեց Եժի Միլլերի նախորդ զեկույցը, ըստ որի վթարի պատճառը եղել է այն, որ ինքնաթիռն իջել է նվազագույն բարձրությունից և բախվել ծառերին, ինչը հանգեցրել է ինքնաթիռի կառուցվածքի ոչնչացմանը։  Մացերևիչն ասել է, որ միջադեպի պատճառները բացատրող պարտադիր փաստաթուղթը պետք է լինի իր հանձնաժողովի զեկույցը։

2022 թվականի ապրիլին ենթահանձնաժողովը ներկայացրել է իր զեկույցը, որտեղ առաջ է քաշվել այն թեզը, որ աղետի պատճառը ձախ թևում և կենտրոնում պայթյուններն են եղել։ Այդ ժամանակ հայտարարվել էր նաև, որ դատախազություն ծանուցում է ուղարկվել նախագահ Լեխ Կաչինսկու և 95 այլ անձանց սպանության հետ կապված հնարավոր քրեական հանցագործության մասին։ Նույն թվականի սեպտեմբերին այն ժամանակվա պաշտպանության նախարար Մարիուշ Բլաշչակը երկարաձգել էր մարմնի լիազորությունների գործողության ժամկետը մինչև 2024 թվականի օգոստոսը։