Դեպի իսլամի սրբատեղիներ Մեքքա եւ Մեդինա կատարվող հաջը պաշտոնապես սկսվում է այսօր`  Սաուդյան Արաբիայում: Այն մուսուլմանների պարտականություններից մեկն է, եւ  նրանց երաշխավորում է մեղքերի թողություն ու հանդերձյալ կյանքում հավերժական վայելքների վաստակում: Ամեն մի ճշմարիտ մուսուլման պետք է գոնե մեկ անգամ կյանքի ընթացքում հաջ կատարի:

Ինչպես հայտնում է ԻՏԱՌ-ՏԱՍՍ-ը, այս տարվանից սկսած որոշակի սահմանափակումներ են մտցվել:  Այսպես, հավատացյալներին արգելվում է ծխել սրբավայրերի տարածքում,  խախտում կատարողները մեծ տուգանքներ կվճարեն: 

Արգելվում է նաեւ տնտեսման նկատառումով քնել գետնին` որոշակի զրկանքներ կրելով:

Ինչպես սպասվում է, այս տարի ուխտագնացության կմեկնեն 2 միլիոն մուսուլմաններ ամբողջ աշխարհից:  Ամեն երկիր որոշակի քվոտա է ստանում: Առաջին ուխտագնացները Սաուդյան Արաբիա են ժամանել շաբաթներ առաջ, որպեսզի նախօրոք նախապատրաստվեն ծիսակատարությունների կատարմանը: Երկրի իշխանությունները հայտնել են, որ այս տարի հաջի ծախսերը զգալիորեն ավելացել են, դրանում նաեւ կազմակերպող ընկերության մեղքը կա:

Այսօր` իսլամական օրացույցով «Դհու ալ հիջայի» 8-րդ օրը, միլիոնավոր ուխտագնացներ, «իհրամ»-ը (ուխտավորների հոգեւոր մաքրության հատուկ վիճակ),  խորհրդանշող սպիտակ հագուստներով,  25 կմ երկարությամբ դժվարին ճանապարհ կհաղթահարեն` դեպի Արաֆաթ լեռը, որտեղ կանցկացվի գլխավոր ծիսակատարությունը: