ՆախընտրելիԱդրբեջանի քաղբանտարկյալների իրավիճակը ԵԽԽՎ իրավական հարցերի եւ մարդու իրավունքների հանձնաժողովի լսումների առարկա կդառնա, որի նիստը տեղի է ունենալու նոյեմբերի 16-ին Փարիզում:
Հանդիպման ընթացքում ԵԽԽՎ նշված կառույցի քաղբանտարկյալների գծով ներկայացուցիչ Քրիստոֆեր Շտրասերը հանդես կգա կեսժամանոց զեկույցով: Այնուհետեւ խոսքը կտրամադրվի նախկին քաղբանտարկյալ, «Հանուն մարդու իրավունքների» ՀԿ-ի ներկայիս ղեկավար Էյնուլա Ֆաթուլաեւին: «Ես մտադիր եմ հանձնաժողովի անդամներին տեղեկացնել այդ ոլորտում տիրող իրավիճակի մասին եւ նրանց ուշադրությունը հրավիրել հրատապ խնդիրների լուծման անհրաժեշտության վրա», - «Թուրան» գործակալությանն ասել է Ֆաթուլաեւը:
Ըստ Ադրբեջանի իրավապաշտպանների` երկրում քաղբանտարկյալների թիվը գերազանցում է 70-ը: Տարվա սկզբին քաղբանտարկյալների ցանկը համալրեցին ապրիլի 2-ի հանրահավաքի ընթացքում 14 ձերբակալվածները, որոնց թվում են երիտասարդ ակտիվիստներ Բախտիյար Հաջիեւը, Ջաբար Սավալանը, իրավապաշտպան Վիվադի Իսկանդարովը, «Ժողովրդական ճակատ» կուսակցության ակտիվիստ Շահին Հասանլին, Ազգային պետականության կուսակցության առաջնորդ Նեյմաթ Փանահլին:
Նշենք, հոկտեմբերին Ադրբեջանի իշխանությունները հերթական անգամ ԵԽԽՎ զեկուցող Շտրասերին վիզա չէին տրամադրել: Ադրբեջանի իշխանությունները համառորեն հերքում են երկրում քաղբանտարկյալների առկայությունը եւ պնդում են վերանայել «քաղբանտարկյալ» հասկացության միջազգային համընդհանուր չափանիշները:
