Իռլանդիայի, Լյուքսեմբուրգի և Բելգիայի նախարարները երեքշաբթի հրապարակայնորեն քննադատել են Հունգարիային՝ հարցեր բարձրացնելով՝ արդյոք վարչապետ Վիկտոր Օրբանի կաբինետը հարգո՞ւմ է Եվրամիության արժեքներն ու չափանիշները, գրում է Associated Press-ը։

Հուլիսին Հունգարիան նախագահում էր 27 երկրների դաշինքում: Օրբանն անմիջապես անսպասելի ուղևորություն կատարեց Մոսկվա՝ հանդիպելու համար Ռուսաստանի նախագահ Վլադիմիր Պուտինին՝ զայրացնելով ԵՄ իր գործընկերներից մի քանիսին, ովքեր պնդում էին, թե Հունգարիայի առաջնորդը չի ներկայացնում իրենց շահերը:

«Ես միաժամանակ կհարցնեմ գործընկերոջս (Եվրոպայի հարցերով նախարար Յանոշ Բոկին), չլինի՞ վաղը ծրագրում է Մոսկվա մեկնել, քանի որ հունգարացի քաղաքական գործիչների շրջանում դա կարծես թե սովորություն է դարձել», - Բուդապեշտում անցկացված հանդիպման ժամանակ հայտարարել է Լյուքսեմբուրգի արտգործնախարար Քսավյե Բետելը:

Բացի Ռուսաստանի հետ իր կապերից, Օրբանի կառավարությունը ԵՄ գործընկերներին նյարդայնացրել է ներգաղթյալների և միասեռականների իրավունքների նկատմամբ թշնամանքը խրախուսելով, ինչպես նաև  պետական ​​լրատվամիջոցները վերահսկելով:

ԵՄ-ի միլիոնավոր եվրոյի միջոցները նույնպես սառեցվել են Հունգարիայի դեմոկրատական ​​հետընթացին առնչվող մտահոգությունների պատճառով: Բետելը, նրա բելգիացի գործընկեր Հաջա Լահբիբը և Իռլանդիայի եվրոպական հարցերով նախարար Ջենիֆեր Քերոլ ՄըքՆիլը հայտնել են, որ իրենք համատեղ հանդիպումներ են ունեցել հունգարական լրատվամիջոցների, քաղաքացիական հասարակության և ԼԳԲՏ համայնքի ներկայացուցիչների հետ երեքշաբթի Յանոշ Բոկի նախագահությամբ հանդիպմանը:

Լահբիբն ասել է, որ ցանկանում է հասկացնել, որ «Հունգարիայի նախագահությունը պետք է հավակնոտ լինի, և որ պետք է միավորվի և կամուրջներ գցի Եվրամիության անդամ 27 երկրների միջև»:

Նա Բուդապեշտին կոչ է արել վերացնել Ուկրաինային զենք մատակարարելու ԵՄ ֆինանսավորման նկատմամբ վետոն։

Նախարարներն իրենց հայտարարություններն արել են ուղիղ հունգարական հեռուստատեսության տեսախցիկի առջև՝ առանց լրագրողների հուշման։ Դա Հունգարիայի համար անսովոր և անհարմար հրապարակային ցույց էր, հաշվի առնելով, որ ԵՄ անդամ երկրները հազվադեպ են միմյանց հրապարակայնորեն քննադատում, ընդգծում է Associated Press գործակալությունը։