Վրաստանի նախկին նախագահ Միխեիլ Սաակաշվիլին ԱՄՆ Կոնգրեսի միջանկյալ ընտրություններում դեմոկրատների համոզիչ հաղթանակը դաս է անվանել Վրաստանի համար, հաղորդում է «Գրուզիա Online»-ը։

Նրա կարծիքով՝ քվեարկության արդյունքը ցույց է տվել, որ կյանքի թանկացման և սոցիալական անարդարության նկատմամբ քաղաքացիների դժգոհությունը կարող է ավելի ուժեղ լինել, քան ազդեցիկ քաղաքական գործիչների և նրանց կողմնակիցների ֆինանսական ռեսուրսները։

Դեմոկրատները վերահսկողություն են ստացել Կոնգրեսի երկու պալատների նկատմամբ, ինչը լուրջ պարտություն է դարձել հանրապետականների համար։ Ինչպես Սաակաշվիլին գրել է սոցիալական ցանցերում, նույնիսկ Իլոն Մասկի և այլ ունևոր կողմնակիցների խոշոր ֆինանսական ներդրումները չեն օգնել հանրապետականներին հաղթանակի հասնել։ Ըստ նրա՝ քվեարկության արդյունքները նաև վշտացրել են Ռուսաստանին և անձամբ Վլադիմիր Պուտինին։

Խոսելով Վրաստանում տիրող իրավիճակի մասին՝ Սաակաշվիլին հայտարարել է, որ փոփոխությունների հանրային պահանջն ի զորու է հաղթահարելու ցանկացած խոչընդոտ։ Նա իշխող «Վրացական երազանք» կուսակցության հիմնադիր Բիձինա Իվանիշվիլիին մեղադրել է քաղաքական մրցակցությունը ճնշելու, աջակցություն ստանալու համար ֆինանսական ռեսուրսներն օգտագործելու և ընդդիմության հնարավորությունները սահմանափակելու մեջ։

Սաակաշվիլին պնդում է, որ երկրում փոփոխությունները կապված են իր և իր համախոհների, ինչպես նաև ուժեղ վրացական պետության ու արդյունավետ կառավարման գաղափարի հետ։ Նա հայտարարել է, որ մտադիր է մնալ Վրաստանում և երկրի ներսում հասնել քաղաքական փոփոխությունների։