նախընտրելի դարձնել
Շվեյցարիան, հիմնվելով չեզոքության սկզբունքներին իր հավատարմության վրա, որոշել է ձեռնպահ մնալ Միացյալ Նահանգներ զենք մատակարարելուց Իրանի հետ հակամարտության ընթացքում, նշվել է Դաշնային խորհրդի (կառավարության) կայքում տեղադրված հայտարարության մեջ։
«Մարտի 20-ին Դաշնային խորհուրդը քննարկել է չեզոքության սկզբունքը իրանական հակամարտության մեջ ներգրավված պետությունների արտահանման վրա կիրառելու հետեւանքները։ Ռազմական նյութերի արտահանումը Իրանի հետ միջազգային զինված հակամարտության մեջ ներգրավված երկրներ չի կարող թույլատրվել հակամարտության ողջ ընթացքում»,- նշվել է հայտարարության մեջ։ Կառավարությունը շեշտել է, որ փետրվարի 28-ին հակամարտության սրացումից ի վեր «ԱՄՆ ռազմական նյութերի արտահանման նոր լիցենզիաներ չեն տրամադրվել»։ Ավելին, համադաշնությունը մի քանի տարի շարունակ չի տրամադրել «Իսրայել կամ Իրան ռազմական սարքավորումների արտահանման լիցենզիաներ»։
Շվեյցարիայի տնտեսական հարցերով պետական քարտուղարության տվյալների համաձայն՝ Միացյալ Նահանգները Գերմանիայից հետո շվեյցարական զենքի երկրորդ խոշորագույն ներմուծողն է։ Այսպես, 2025թ․ Վաշինգտոնը Բեռնից գնել է 94.2 միլիոն ֆրանկի (119.6 միլիոն դոլար) ռազմական ապրանքներ, մինչդեռ Բեռլինը՝ 386.4 միլիոն ֆրանկ (490.8 միլիոն դոլար) արժողությամբ։ Շվեյցարիայից զենքի արտահանման ընդհանուր ծավալը 2025թ․ 2024թ․ համեմատ աճել է 17 տոկոսով՝ հասնելով 948.2 միլիոն ֆրանկի (1.2 միլիարդ դոլար)։ Այսպիսով, Միացյալ Նահանգներին բաժին է ընկնում Շվեյցարիայի ռազմական արտահանման մոտ 10 տոկոսը։
