Դիարբեքիր հայկական Սուրբ Կիրակոս եկեղեցում վերանորոգումից հետո առաջին անգամ Սուրբ Զատիկի պատարագն է մատուցվել:
Թուրքական Haberfx-ի փոխանցմամբ` Սուրբ Կիրակոսում Սուրբ Զատիկի պատարագն իրականացվել է Հաթայ նահանգում գտնվող «Քառասուն մանուկ» եկեղեցու հոգեւոր սպասավոր Ավետիս Թաբաշյանի գլխավորությամբ:
Պատարագին բացի Դիարբեքիրի հայերից մասնակցել է նաեւ Սուրի քաղաքապետ Աբդուլլահ Դեմիրբաշը եւ այլ պաշտոնյաներ:
Նշենք, որ Մերձավոր Արեւելքի ամենամեծ եկեղեցիներից մեկի՝ Սուրբ Կիրակոսի վերաբացումն ու օծումը տեղի է ունեցել 2011-ի հոկտեմբերի 22-ին, իսկ առաջին պատարագը մեկ օր անց՝ հոկտեմբերի 23-ին:
Դիարբեքիրի Սուրբ Կիրակոս եկեղեցին կառուցվել է 1376-ին, Հանչեփեք թաղամասում, որը տեղի մահմեդականները անվանել են «գյավուրների թաղամաս» քանի որ մեծ թվով քրիստոնյաներ են ապրել մինչեւ Հայոց ցեղասպանությունը: