Մոսկվայի գլխավոր ռաբբի, Եվրոպայի ռաբբիների խորհրդի նախագահ Փենխաս Գոլդշմիդտը Թուրքիայի վարչապետի վերջին հայտարարությունը համարել է հակասեմիտիզմի դրսեւորում եւ հիշեցրել այն մասին, որ Թուրքիան մինչ օրս չի ճանաչել Հայոց ցեղասպանությունը:
Թուրքիայի վարչապետ Ռեջեբ Էրդողանը սիոնիզմը համեմատել էր ֆաշիզմի հետ, այն համարելով «հանցագործություն մարդկության դեմ», ինչը դժգոհության ալիք է առաջացրել ողջ աշխարհում:
Գոլդշմիդտը Էրդողանի հայտարարությունը բնութագրել է որպես տգետ հարձակում հրեական ժողովրդի վրա, որն ըստ էության ուղղված է աշխարհի դեմ: Նա հայտարարել է, որ «Էրդողանը նույն մակարդակի վրա է Իրանի նախագահի եւ խորհրդային առաջնորդների հետ», հաղորդում է «Reuters»-ը:
«Այդ հեգնական մեկնաբանությունները չեն անցնի այն հայ ընտանիքների կողքով, որոնց նախնիները սպանվել են ցեղասպանության ժամանակ. հանցագործություն, որը մինչ օրս ճանաչված չէ Թուրքիայի կառավարության կողմից»,-ասել է Գոլդշմիդտը: