Ախթալայի քաղաքապետ Հայկազ Խաչիկյանը հերքում է, թե մանկապարտեզում շինարարություն կատարելիս յուրացումներ անելու համար հայտնվել է իրավապահների ուշադրության կենտրոնում: NEWS.am-ի թղթակցի հետ զրույցում նա ասաց, որ նման բան չկա, իրեն չեն կանչել ոստիկանություն: «Երեք մանկապարտեզ ունենք, ես որեւէ մեկի շինարարության ժամանակ յուրացում չեմ թույլ տվել եւ չեմ էլ կարող թույլ տալ, որովհետեւ շինարարությունը մենք չենք անում, այլ շինարարական կազմակերպությունը»,-ասաց քաղաքապետը:
Իսկ ոստիկանության լրատվական ծառայությունից NEWS.am-ի թղթակցին հաստատեցին, որ մի քաղաքացի դիմել է իրենց եւ հայտնել, որ Հայկազ Խաչիկյանը չարաշահումներ է թույլ տվել: Նախապատրաստված նյութերը ուղարկվել է քննչական կոմիտե:
Նշենք, որ «Ժողովուրդ»-ի տեղեկություններով՝ ՀՀ սոցիալական ապահովության պետական ծառայության նախկին ղեկավար, թոշակների յուրացման մեջ մեղադրվող ՀՀԿ-ական Վազգեն Խաչիկյանի եղբայրը՝ Ախթալայի քաղաքապետ Հայկազ Խաչիկյանը, հայտնվել է իրավապահների ուշացրության կենտրոնում:
Ըստ նույն տեղեկությունների՝ Ախթալայի մի բնակիչ իրենց քաղաքապետի դեմ ոստիկանության կազմակերպված հանցագործությունների դեմ պայքարի բաժին բողոք է ներկայացրել, համաձայն որի քաղաքապետը մանկապարտեզի շինարարական աշխատանքների ընթացքում յուրացումներ է թույլ տվել»,-գրում է թերթը: