ԼՂՀ ՊԲ հարավարեւելյան ուղղությամբ տեղակայված զորամասերից մեկում դեկտեմբերի 4-ին մահացու վիրավորում ստացած 19-ամյա Արթուր Մարգարյանը գյումրեցի էր, սովորում էր տնտեսագիտական համալսարանի Գյումրիի մասնաճյուղում:
NEWS.am-ի թղթակցի հետ զրույցում Գյումրիի Պուշկինի անվան 6-րդ դպրոցի տնօրեն Արտաշես Սարգսյանը, որի աշակերտն էր Արթուրը, պատմեց, որ նա շատ խելացի եւ ժիր տղա էր:
«Շատ խելոք, սովորող երեխա էր, հրաշալի ընտանիք ուներ, ծնողները շատ կրթված են, մշտական աշխատանք ունեն, եղբայրն էլ է մեզ մոտ սովորել: Արթուրից մեծ էր տարիքով»,- ասաց տնօրենը:
Նրա խոսքով՝ դեռ հայտնի չէ, թե ինչ հանգամանքներում է մահացել գյումրեցի զինվորը:
Մեր տեղեկություններով, զինվորը մեկ տարվա ծառայող էր եւ պետք է զորացրվեր եկող տարվա աշնանը:
Ավելի վաղ ՊԲ-ի մամուլի ծառայությունը հայտնել էր, որ դեկտեմբերի 4-ին, ժամը 15:40-ի սահմաններում մահացու հրազենային վիրավորում է ստացել զինծառայող, 1995թ. ծնված Արթուր Պերճի Մարգարյանը: Միջադեպի մանրամասները պարզելու համար տարվում է քննություն:
