![](img/news/25/06/06/default.jpg)
NEWS.am-ին հայտնի է դարձել, որ փետրվարի 1-ի կեսգիշերին Հաղարծինում ծեծկռտուք է տեղի ունեցել, որի ժամանակ կրակոցներ են հնչել:
Վեճը հրազդանցիների եւ նույն գյուղի բնակիչների միջեւ է եղել՝ աղջկա առեւանգման պատճառով: Մոտ տասը հոգի Հրազդանից մեկնել են Հաղարծին, բնակիչներից մեկի տուն, պնդելով, թե տվյալ բնակչի 31-ամյա ազգականը առեւանգել է հրազդանցի իրենց բարեկամուհուն:
Շենքի բակում վիճաբանություն է տեղի ունեցել, որը թեժացել է: Հրազդանցիներից մեկն ատրճանակը պահել է իր զրուցակցի քունքին՝ սպառնալով, թե փախցնելու է իրենց տան հարսին, մինչեւ չվերադարձնեն փախցրած բարեկամուհուն:
Հաղարծինցիները փորձել են կանխել, որի հետեւանքով սկսվել է ծեծկռտուք, մեկն էլ իր մոտ եղած ատրճանակից կրակոցներ է արձակել:
Կողմերը տարբեր առարկաներով հարվածներ են հասցրել միմյանց՝ պատճառելով մարմնական վնասվածքներ և նույն առարկաներով վնասել են շենքի բակում կայանված, ավտոմեքենաները: Բարեբախտաբար կրակոցներից տուժողներ չեն եղել:
Այս տեղեկության վերաբերյալ NEWS.am-ը փորձել է պարզաբանում ստանալ ոստիկանությունից, որտեղից հաստատել են տեղի ունեցած միջադեպը եւ նշել, որ կատարված զննությամբ դեպքի վայրից հայտնաբերվել է 6 հատ կրակված պարկուճ, 3 հատ փամփուշտ:
Ձեռնարկված օպերատիվ հետախուզական միջոցառումների շնորհիվ Հաղարծին գյուղի 1-ին փողոցի 9-րդ փակուղու կամրջակի մոտից խուլիգանություն կատարելու կասկածանքով բերման են ենթարկվել Հրազդանի 10-11 բնակիչներ, նրանցից մեկի մոտ անձնական խուզարկության ժամանակ հայտնաբերվել է գազային ատրճանակ: Հանգամանքները պարզվում են: