Երեւանի Բաղրամյան պողոտայում նստացույց անող քաղաքացիները մեկ րոպե լռությամբ հարգեցին Գյումրիում այս տարվա հունվարին դաժանաբար սպանված Ավետիսյանների ընտանիքի կրտսեր անդամի` Սերյոժա Ավետիսյանի հիշատակը:
Նշենք, որ այսօր Սերյոժա Ավետիսյանը կդառնար 1 տարեկան:
Հիշեցնենք, որ օրեր առաջ Ավետիսյանների սպանության գործի վարույթը եւ ռուս զինծառայող Վալերի Պերմյակովին Հայաստանի իրավապահներին հանձնելու որոշում է կայացվել:
Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր: Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյո՞ք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին:
