Երեւանի Ուլնեցի փողոցում հուլիսի 29-ին Մխիթարյան ամուսինների սպանության մեջ կասկածվող տղամարդուն քիչ առաջ հայտնաբերել են:
NEWS.am-ի տեղեկություններով՝ տղամարդը հրազենային վնասվածք է ունեցել, նրան տեղափոխել են Երեւանի հիվանդանոցներից մեկը:
Նշենք, որ 53-ամյա Հովհաննես եւ 44-ամյա Լուսինե Մխիթարյանները երկու զավակ ունեին: Նրանց դուստրը Հայաստանում չի բնակվում, որդին ծառայում է բանակում: Նրանց սպանել էին ավտոտնակի առջեւ, որտեղ ապրում են: Սպանված տղամարդն ավտոտնակի հարեւանությամբ ավտոտեխսպասարկման կետ ուներ:
Փաստի առիթով հարուցվել է քրեական գործ՝ ՀՀ Քրեական օրենսգրքի 104 հոդվածի 2-րդ մասի եւ 235 հոդվածի 1-ին մասի հատկանիշներով:
Ավելի վաղ NEWS.am-ը հաղորդել էր, որ հուլիսի 29-ին, ժամը 18:48-ին ահազանգ է ստացվել, որ Երեւանի Ուլնեցու փողոցի թիվ 30 շենքի բակում կրակոցներ են լսվել, ամուսիններն ընկած են գետնին, անհրաժեշտ է օգնություն:
Դեպքի վայր մեկնած օպերատիվ խումբը պարզել է, որ Ուլնեցու փողոցի թիվ 30 շենքի բակում անձը չպարզված տղամարդը հրազենային կրակոցներ է արձակել ամուսինների վրա, որոնք տեղում մահացել են:
