Լեհաստանի ընդդիմությունը կարծում է, որ իշխող կուսակցության՝ սահմանադրական փոփոխություններ կատարելու պլանները կարող են վտանգավոր լինել ժողովրդավարության համար եւ չեն կարող գրվել մեկ կուսակցության կողմից, հայտնում է TVN-ը։
«Իրավունք եւ արդարություն» կուսակցության ղեկավար Յարոսլավ Կաչինսկին մայիսի 2-ին կարծիք էր հայտնել, որ 2017 թվականը հաջող պահ կլինի սահմանադրական փոփոխությունների համար։ Թե կոնկրետ ինչ փոփոխություններ նա նկատի ուներ, հայտնի չէ։ Նրա կարծիքով այդ փոփոխությունները պետք է մշակվեն կուսակցության մակարդակով, իսկ հետո՝ Սեյմում։
Ընդդիմադիր «Քաղաքացիական պլատֆորմ» կուսակցության անդամ Ցեզարի Տոմչիկը կարծում է, որ սահմանադրական փոփոխությունների նախագիծը, որը մշակվել էր իշխող կուսակցության կողմից 2010-ին, շատ վտանգավոր է լեհական ժողովրդավարության համար։ Նա նշել էր, որ իշխող կուսակցությունն արդեն շատ վնաս է հասցրել ժողովրդավարությանը եւ չի պահպանում գործող սահմանադրությունը։
Նշենք, որ սահմանադրական փոփոխությունների նախագիծը կարող է առաջ քաշվել պատգամավորների առնվազն 1/5-ի, Սենատի կամ նախագահի կողմից։ Սեյմում նախագիծն ընդունելու համար անհրաժեշտ է պատգամավորների առնվազն կեսի ներկայությամբ ձայների 2/3-ը։