ԼՂՀ նախագահի մամուլի խոսնակ Դավիթ Բաբայանը ադրբեջանական կողմի հերթական սադրանք է որակել ԼՂՀ պաշտոնական իշխանություններին եւ ժողովրդին իրեն «ադրբեջանական համայնք» կոչող կառույցի հետ հավասարեցնելու փորձերը։
Երեւանից հետո Բաքու մեկնած ԵԱՀԿ գործող նախագահ, Գերմանիայի արտգործնախարար Ֆրանկ–Վալտեր Շթայնմայերը հանդիպել է փախստականների հետ։ ԱՊԱ—ի փոխանցմամբ՝ հանդիպման ժամանակ ադրբեջանական կողմի ներկայացուցիչը առաջարկել է կազմակերպել «երկու համայնքների հանդիպումը»։
Շթայնմայերը հայտնել է, որ կհարցնի այդ մասին հայկական համայնքի կարծիքը։ «Մենք կջանանք կազմակերպել նման հանդիպում»,– հայտնում է աղբյուրը։
NEWS.am–ի թղթակցի խնդրանքով մեկնաբանելով այդ տեղեկությունը՝ Դավիթ Բաբայանը նշեց, որ քաղաքական ընկալմամբ «ադրբեջանական համայնք» հասկացություն գոյություն չունի։
«Կա Լեռնային Ղարաբաղի Հանրապետություն՝ նախագահով, արտգործնախարարով եւ այլ պաշտոնյաներով, որոնց հետ պարոն Շթայնմայերը հանդիպեց հունիսի 30-ին»,– նշել է Բաբայանը։ Որպես տարբերակ՝ Բաբայանն առաջարկել է «ադրբեջանական համայնքին» «Ղարաբաղ» անունով ինքնավարության կարգավիճակ տրամադրել Ադրբեջանի տարածքում եւ դրանով փակել հարցը։
Դավիթ Բաբայանի խոսքով՝ քանի որ այցի ժամանակ ԵԱՀԿ գործող նախագահը քննարկել է շատ ավելի լուրջ հարցեր՝ միջադեպերի հետաքննության մեխանիզմների ստեղծումը, դեսպան Կասպշիկի թիմի հնարավորությունների ընդլայնումը, ապա Բաքվում օգտվել են եւ փորձել են «փաստի առջեւ կանգնեցնել» նրան։
«Եթե պարոն Շթայնմայերը պատասխանել է հենց այդպես, ինչպես ներկայացնում են ադրբեջանական լրատվամիջոցները, իսկ նրանք սովորաբար ներկայացնում են սեփական մեկնաբանություններով, ապա անհրաժեշտ է նշել, որ նշված ձեւաչափը չի կարելի ո՛չ տրամաբանական համարել, ո՛չ իրատեսական, այլ միայն ադրբեջանական կողմի հերթական սադրանքը»,– հավելել է Դավիթ Բաբայանը։