նախընտրելի դարձնելՂրղըզստանի իրավապահները կալանավորել են ցուցարարներին, որոնք նախօրեին գրավել էին «Տամգա» հենակետը եւ հոսանքազրկել ոսկու խոշորագույն «Կումտոր» հանքը: Այս մասին, այսօր՝ մայիսի 31-ին, «ՌԻԱ Նովոստիին» հայտնել է հանրապետության ՆԳՆ ներկայացուցիչը: Ցուցարարներին ցրելուց հետո էներգետիկները ամբողջությամբ վերականգնել են էներգամատակարարումը:
Զանգվածային անկարգությունների կազմակերպման համար մի քանի տասնյակ մարդ ձերբակալվել է, հայտնում է ԻՏԱՌ-ՏԱՍՍ-ը:
Մայիսի 30-ին ցուցարարները գրավել էին «Տամգա» հենակետը եւ հոսանքազրկել երկրի ոսկու խոշորագույն «Կումտոր» հանքը, որը տեղակայված է Իսսիկ-Կուլի շրջանում, եւ մի քանի շրջակա գյուղեր: Բողոքի ցույցին 200 մարդ էր մասնակցել (այլ տվյալներով՝ 500):
Բողոքողները պահանջում էին չեղյալ հայտարարել կանադական Centerra Gold Inc. ընկերության հետ կնքած պայմանագիրը, ավելացնել տեղի բնակչության սոցիալական նպաստները եւ շրջանային հիվանդանոցի նոր շենք կառուցել:
Ղրղըզստանի վարչապետ Ժանտարո Սաթիբալդիեւը մայիսի 30-ի ուշ երեկոյան արտակարգ խորհրդակցություն էր հրավիրել, քննարկվել էր իրավիճակի կայունացման հարցը:
«Կումտոր» հանքը երկրի հանքարդյունահանման ոլորտի խոշորագույն ձեռնարկությունն է: 2009թ.-ից այն կառավարում է կանադական Centerra Gold Inc. ընկերությունը:
