Գյումրիում անցած տարվա հունվարի 12-ին Ավետիսյանների սպանության գործով ունեցած արդյունքը մեծապես պայմանավորված էր Գյումրիում սպանության առաջին օրերին ժողովրդի լայնածավալ ընդվզմամբ, որի շնորհիվ էլ գործն այսօր քննվում է Հայաստանի դատարանի կողմից: NEWS.am-ի թղթակցի հետ զրույցում նման կարծիք հայտնեց գործով տուժողի իրավահաջորդի ներկայացուցիչ, փաստաբան Լուսինե Սահակյանը՝ պատասխանելով հարցին, թե Ավետիսյանների սպանությունից ուղիղ մեկ տարի անց ինչ արդյունքներ ունի հայկական կողմը:
«Հայաստանի յուրաքանչյուր քաղաքացի պետք է գիտակցի, որ Ավետիսյանների սպանության գործով լիարժեք քննությունը եւ արդարադատության իրականացումը բխում է բոլորի շահերից, եւ բոլորը պետք է շահագրգրռված լինեն այս գործի արդարացի լուծմամբ: Ցավոք սրտի, ՀՀ իրավապահների պատճառով այս գործով, ի սկզբանե, ստեղծվեց շատ բարդ իրավիճակ: Պատճառն այն էր, որ մեր իրավապահները տապալեցին Պերմյակովի որոնողական աշխատանքները եւ նրանց թողտվությամբ Պերմյակովը փոխարենը ձերբակալվեր ՀՀ իրավապահների կողմից, խիստ կասկածելի հանգամանքներում հայտնվեց ռուսական ռազմաբազայում»,- ասաց Լուսինե Սահակյանը:
Ինչ վերաբերում է դատական քննությանը, ապա փաստաբանն ակնկալում էր, որ այն պետք է լիովին այլ մակարդակի լիներ, քանի որ սա Հայաստանի՝ որպես պետության, հեղինակության խնդիրն է:
«Այս դատական քննությամբ Հայաստանի Հանրապետությունը պետք է ապացուցեր, որ թույլ չի տա որեւէ երկրի, այդ թվում նաեւ իրեն դաշնակից համարվող պետության, ոտնահարելու իր երկրի քաղաքացու շահերը: Եթե երկիրը չի կարող ցույց տալ իր ուժը նույնիսկ այն դեպքում, երբ մի ամբողջ ընտանիքի սպանդ է կատարվում, ապա լուրջ վտանգի տակ է նման երկրի սուվերենությունը: Ավետիսյանների ընտանիքի հետ տեղի ունեցածը սովորական սպանություն չէ, որը կատարված լիներ շարքային քաղաքացու կողմից: Սպանության մեջ կասկածվողը ՌԴ զինծառայող է, ինչը նշանակում է, որ նրա գործողությունների համար պատասխանատվություն կրում է Ռուսաստանի Դաշնությունը»,- ասաց Լուսինե Սահակյանը:
Փաստաբանի խոսքով՝ այս պարագայում պետք է ծագեր Հայաստանի պահանջատիրությունը ՌԴ-ից, ինչի ականատեսը, ցավոք սրտի, մենք առայժմ չենք. «Միայն այն հանգամանքը, թե ինչ պայմաններում է ընթանում դատական քննությունը, արդեն իսկ բավարար է դատելու, որ Հայաստանը այդպես էլ իրեն այս գործով պահանջատեր չի զգում: Այն, որ Պերմյակովը կդատապարտվի եւ այն էլ ցմահ, չեմ կասկածում, բայց դա չէ այս գործի արդարացի լուծումը: Եթե այս դատավճռով սահմանափակվենք, ապա հայ ազգը մշտապես գտնվելու է տուժողի կարգավիճակում»:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը դեկտեմբերի 18-ին սկսել է դատավարությունը: Նիստերը, սակայն, տեղի են ունենում ռուսական ռազմաբազայի տարածքում:
