Ռուսաստանը շարունակում է «ռազմական սպառնալիքի» քաղաքականությունը՝ իր «լայնածավալ ու անսպասելի մանևրներով»։ Այս մասին հայտնել է ՆԱՏՕ-ի գլխավոր քարտուղար Ենս Սթոլթենբերգը, փոխանցում է DW–ն։
Նրա խոսքով, Դաշինքը շարունակում է ուժեղացնել «զսպման ու պաշտպանության» քաղաքականությունը, որը ներառում է ՆԱՏՕ-ի ներկայության մեծացում ոչ միայն Արևելյան Եվրոպայում, այլև Սև ծովում։ ՆԱՏՕ-ի գլխավոր քարտուղարը նշել է, որ Հյուսիսատլանտյան դաշինքը ծայրաստիճան մտահոգված է Հալեպի վերսկսված ռմբակոծություններով, նաև ռուսական ավիակիր խումբը Միջերկրական ծովում գործածելու հնարավորությամբ՝ այդ քաղաքի վրա հարվածներն ուժեղացնելու համար։