Ազգային ժողովում այսօր մթնոլորտը թեժ էր: Կրկին քննարկում էին «1000 դրամ բանակին» նախաձեռնությունը: Պատգամավորները, ընդհանուր առմամբ, համակարծիք են. Հայաստանում չկա որեւէ քաղաքացի, որը դեմ կլինի զինվորին եւ բանակին օգնելուն, այլ հարց է, որ վստահ չեն, որ գումարներն ըստ նշանակության կօգտագործվեն: Նաիրա Զոհրաբյանը նույնիսկ մտածել է, որ եթե ստեղծվող հիմնադրամում վստահություն եւ հարգանք վայելող մտավորականներ լինեին, կարող էին հավատալ լինել դրա գործունեությանը, բայց, ասում է, այդպիսիք չեն մնացել:
Նա նաեւ առաջարկել է նախ պատասխանատվության ենթարկել բանակի թալանով զբաղված անձանց, որպեսզի քաղաքացին տեսնի, որ երկրում պատասխանատվության ինչ-որ մակարդակ կա: Կորյուն Նահապետյանն էլ կոչ է արել փաստեր ներկայացնել: Ամեն դեպքում՝ ԲՀԿ-ն կողմ է քվեարկելու նախագծին, քանի որ համազգային գաղափար է համարում բանակի կամ զինվորի շուրջ համախմբումը:
Ռուբեն Հակոբյանը զայրացել էր: Նրան դուր չի եկել, որ Կորյուն Նահապետյանն անընդհատ կոչ է անում կոռուպցիայի մասին փաստեր ներկայացնել իրավապահներին. այդ դեպքում ինչո՞վ են զբաղված այդ մարմինները, ինչո՞ւ իրենք չեն հետաքննում:
Օրինագծին կողմ է քվեարկելու նաեւ Նիկոլ Փաշինյանը, որովհետեւ սա հայոց բանակի մարտունակությունը բարձրացնելուն ուղղված նախագիծ է համարում: Բայց օրինագիծը տուգանք է բնորոշում, պատիժ, որ 25 տարվա ընթացքում չենք կարողացել այնպիսի պետություն ստեղծել եւ իշխանություն ձեւավորել, որը կհոգար հայ զինվորի կարիքները: Անդրադառնալով պաշտպանության նախարարի առաջարկին, որ հարկավոր է այս վճարումից ազատել զոհված կամ հաշմանդամ զինծառայողների եւ բանակի շարքերում զինվոր ունեցող ընտանիքներին, Փաշինյանն առաջարկել է այդ ընտանիքներին ավելի կարեւոր հոգսերից ազատել:
Արցախում կրտսեր սերժանտի կողմից սպանված ժամկետային զինծառայող Վարդան Առաքելյանի մարմինն այսօր հողին են հանձնել: Նա Արմավիրի մարզի Արազափ գյուղից էր: Այս համայնքում վարձով բնակվող Առաքելյանների ընտանիքին պաշտպանության նախարարությունը խոստացել է օգնել՝ սեփական տանիքը ձեռք բերել: Գյուղապետ Մանվել Հարությունյանը պատմել է, որ Վարդանի ծառայությունը ձեռքի կոտրվածքի պատճառով երեք տարով հետաձգվել էր, բայց առողջանալուց հետո նա զորակոչվել եւ ծառայել է եղբոր հետ: Եղբայրը պետք է հունվարին զորացրվեր, սակայն հարազատներն ու համագյուղացիները պաշտպանության նախարարությանը խնդրել են նրան թույլատրել 2 ամիս մնալ ծնողների կողքին: Խնդրանքը բավարարվել է:
Արցախի պաշտպանության նախարարությունը հերքել է խոցված անօդաչու սարքի մասին լուրերը: Գերատեսչության մամուլի ծառայության փոխանցմամբ՝ դա ապատեղեկատվություն է: Ադրբեջանական լրատվամիջոցները հաղորդել էին, որ նախօրեին անօդաչու թռչող սարք են խոցել:
Հուլիսի դեպքերի ժամանակ ոստիկանության Երեւանի ՊՊԾ գնդի տարածքից դուրս սպանված ոստիկանի գործով մեղադրանք է առաջադրվել «Սասնա ծռեր» խմբի անդամ Սմբատ Բարսեղյանին։ Յուրի Տեփանոսյանը հրազենային վնասվածքից մահացել էր հուլիսի 30-ին, ըստ ոստիկանության՝ նա սպանվել է դիպուկահարի կրակոցից։ «Սասնա ծռերի» անդամ Վարուժան Ավետիսյանն այդ ժամանակ հերքեց այս տեղեկությունը՝ նշելով, որ Տեփանոսյանը սպանվել է ոստիկանության կողմից։ Այնուամենայնիվ, ոստիկանությունը տեսանյութ տարածեց, որում պատկերված էր Սմբատ Բարսեղյանը։ Սեպտեմբերի սկզբին էլ գլխավոր դատախազը հայտարարեց, թե սպանված երեք ոստիկանների գործով մեղադրանքներ են առաջադրվելու «Սասնա ծռեր»-ի անդամներին։ Երկու ամիս անց Սմբատ Բարսեղյանին սպանության հատկանիշներով մեղադրանք առաջադրվեց։ Թե ում մեղադրանք կառաջադրվի մյուս երկու ոստիկանների սպանության գործով, Հատուկ քննչական ծառայությունը գաղտնի է պահում։ Տեղեկություններ կան, որ ՊՊԾ գնդի գրավման օրը հրաձգության ժամանակ սպանված Արթուր Վանոյանի գործով մեղադրանք է առաջադրվելու Մխիթար Ավետիսյանին։
Շենգավիթի «Լիա» գեղեցկության սրահում տեղի ունեցած սպանության կասկածանքով ձերբակալվածներ կան: Ձերբակալվել է գեղեցկության սրահի սեփականատեր Գեղամ Իսրայելյանը՝ «չարբախցի Գեղամը», նրա կինը եւ Ռուբեն Խաչատրյան անունով եւս մեկ քաղաքացի: «Չարբախցի Գեղամը» հետախուզման մեջ էր: Հիշեցնենք, որ նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը, իսկ տուժածներից Արամ Պետրոսյանը հիվանդանոցում է, նրա վիճակը ծայրահեղ ծանր է: Տեղեկությունների համաձայն՝ վիճաբանությունը ծագել է փողի պատճառով, «չարբախցի Գեղամի» եւ «Ճվճվ Արոյի» տղաների միջեւ: Բնակիչներն ասում են՝ այստեղ հաճախ են քրեական դեմքեր հավաքվում եւ «փողի ռազբորկա» անում:
Հիվանդանոցում 2 տարեկան երեխա է մահացել: Փոքրիկը Ճառագայթային բժշկության եւ այրվածքների գիտական կենտրոն էր տեղափոխվել ծայրահեղ ծանր վիճակում, մարմնի մակերեսի 60 տոկոսի այրվածքով: 3 օր շարունակ բժիշկներն ամեն ինչ արել են՝ նրա կյանքը փրկելու համար, բայց չի հաջողվել։ Նախնական տեղեկություններով, երեխայի վրա եռացրած ջուր է թափվել:
Հայաստանի քաղաքացու մասնակցությամբ խոշոր վթար Մոսկվայում: Իրար են բախվել երկու մարդատար մեքենաներ, որոնից մեկը՝ տաքսի ծառայության ավտոմեքենա: Վերջինը պատահարից հետո նաեւ վրաերթի է ենթարկել տրանսպորտի կանգառում գտնվող մարդկանց: Վրաերթի հետեւանքով 12 մարդ է տուժել, որոնցից 11-ը հիվանդանոց է տեղափոխվել: Ռուսաստանյան իրավապահների տեղեկացմամբ, տաքսու վարորդը Հայաստանի 30-ամյա քաղաքացի է, Մոսկվա է ժամանել 3 ամիս առաջ: Նա 48 ժամով ձերբակալվել է:
Նոյեմբերի 15-ին դոլարն ու եվրոն թանկացել են: Արդյունքում դոլարի փոխարժեքը կազմել է 478 դրամ, եվրոյինը՝ 517, ռուբլունը՝ 7 դրամ 32 լումա, ֆունտինը՝ 594 դրամ։
Նոյեմբերի 16-ին հանրապետության շրջանների զգալի մասում երեկոյան ժամերին տեղումներ են սպասվում: Օդի ջերմաստիճանն աստիճանաբար կնվազի 7-9 աստիճանով: Երեւանում նույնպես վաղը երեկոյան ժամերին տեղումներ կլինեն: