Թուրքիայի հիմնադրամների գլխավոր վարչությունը վերանորոգելու է քրդաբնակ Դիարբեքիր քաղաքի Սուրի շրջանում գտնվող պատմական կառույցները, որոնք վնասվել էին թուրք-քրդական բախումների հետեւանքով։
Թուրքական Anadolu գործակալության փոխանցմամբ՝ Թուրքիայի հիմնադրամների գլխավոր վարչությունը հայտարարել է, թե վերանորոգելու է Սուրի շրջանում գտնվող եւ մեկ տարի առաջ բախումների հետեւանքով վնասված 11 պատմական կառույց, որի մեջ են հայկական կաթոլիկ ու բողոքական եկեղեցիները։
Նշվում է, որ միայն հայկական կաթոլիկ եկեղեցու վերանորոգման համար հատկացվելու է 2 մլն լիրա (650 հազար դոլար)։ Նշված պատմական շինությունների վերանորոգման համար նախատեսված է ծախսել ընդհանուր 40 մլն լիրա։ Եկեղեցիների վերանորգման ավարտը նախանշվում է 2018 եւ 2019 թվականները։
Սուրի հայկական կաթոլիկ ու բողոքական եկեղեցիները վերանորոգվել էին 2011-ին։
Սուրում է գտնվում նաեւ Մերձավոր Արեւելքի ամենամեծ հայկական եկեղեցին՝ Սուրբ Կիրակոսը, որը եւս 2011-ին վերանորոգումից հետո բացվել էր որպես գործող եկեղեցի։ Սուրբ Կիրակոսը եւս վնասվել է բախումների հետեւանքով։