Սոցիալ դեմոկրա Հնչակյան կուսակցության (ՍԴՀԿ) պերկուպերկյանական թեւը որոշել է նոր կուսակցություն գրանցել, քանի որ չեն կարող հանդես գալ ՍԴՀԿ անվանումվ: Բանն այն է, որ ՍԴՀԿ-ն Հայաստանում ղեկավարում է Լյուդմիլա Սարգսյանը եւ դա հաստատվել է դատարանի որոշմամբ:
Այս կապակցությամբ, պերկուպերկյանական թեւը հայտարարություն է տարածել, որում, մասնավորապես, ասվում է.
«Վերջին մեկ տարվա ընթացքում Սոցիալ Դեմոկրատ Հնչակյան կուսակցության շուրջ տեղի ունեցած իրադարձությունները ստիպել են կուսակցությանը գնալ հետեւյալ լուծման:
Հնչակյան կուսակցությունը, ժողովներ անցկացնելով իր մասնաճյուղերում, լսելով շարքային անդամների տեսակետները, եկել է հավաքական որոշման` այն է գնալ իրավաբանական նոր գրանցման եւ դեկտեմբերի առաջիկա շաբաթվա ընթացքում Երեւան քաղաքում հրավիրել համագումար:
Կուսակցությունը, հասկանալով իրավաբանական առանձնահատկությունները, պատրաստվում է նոր գրանցումը ձեւակերպել իբրեւ Հնչակյան Սոցիալ Դեմոկրատ Կուսակցություն:
Միեւնույն ժամանակ, կուսակցությունը շարունակում է մնալ համասփյուռ Հնչակյան ընտանիքի լիիրավ անդամ եւ ունի Հայաստանի ներկայացուցիչը Կեդրոնական Վարչությունում` ի դեմս ընկեր Վահան Շիրխանյանի:
Կուսակցությունը նաեւ վստահ է, որ ՀԱԿ-ի հովանավորյալ,աշխարհասփյուռ եւ Հայաստանի հնչակյանության կողմից մերժված Լյուդմիլա Սարգսյան կոչվող անձն ապօրինաբար եւ անարժանաբար է կրում հնչակյան անվանումը եւ վաղ թե ուշ անցնելու է պատմության անդունդը` կրելով դավաճանի պիտակ:
Կուսակցությունն իր քաղաքական գործունեությունը շարունակելու է` հանուն ազգային եւ ընկերային գաղափարների իրականացման»: Այս մասին NEWS.am-ը տեղեկանում է Հնչակյան մամլո դիվանից:
Հիշեցնենք, որ այսօր ՍԴՀԿ կենտրոնական վարչությունը` Լյուդմիլա Սարգսյանի գլխավորությամբ, իր նիստում որոշում է կայացվել կուսակցությունից հեռացնել Վահան Շիրխանյանին, Գեւորգ Պերկուպերկյանին, Նարեկ Գալստյանին, Գագիկ Մելիքյանին եւ Արսեն Կուպելյանին` «կուսակցության կողմից որդեգրած քաղաքական ընդդիմադիր գիծը փոխելու միտումով ներկուսակցական պառակտում հրահրելու եւ իրականացնելու համար»:
