Վրացի ռեժիսոր Գեորդի Սիխարուլիձեի կարճամետրաժ «Կարմիր խնձորներ» ֆիլմը մտել է Ֆրանսիայի Կլերմոն- Ֆերանեում անցկացվող կարճամետրաժ կինոյի միջազգային փառատոնի մրցութային ծրագիր, հայտնում է «Նովոստի Վրաստանը»։
1979 թ հիմնված փառատոնն այսօր համարվում է կարճամետրաժ ֆիլմերի՝ աշխարհի ամենահեղինակավոր կինոֆորումը։Այս տարի փառատոնը կանցնի փետրվարի 3-ից 11-ը։
«Կարմիր խնձորներ» ֆիլմը նկարահանվել էԵրեւանում ու պատմում է նորաստեղծ ընտանիքի դրամայի մասին։ Ըստ հին հայկական ավանդույթի՝ առաջին ամուսնական գիշերվանից հետո փեսացուի ծնողները հարսնացուի ծնողներին կարմիր խնձորներ են ուղարկում՝ որպես աղջկա կուսության հաստատում ու ի նշան իրենց շնորհակալության։ Մինչդեռ այս պատմության մեջ ամեն ինչ այլ կերպ է ստացվում՝ առաջին ամուսնական գիշերվանից հետո երիտասարդ կնոջ, ամուսնու ու սկեսրայրի միջեւ սկանդալ է բորբոքվում։
«Կարմիր խնձորներ» ֆիլմի սցենարի հեղինակը Օֆելիա Հարությունյանն է՝ Հայաստանից։ Ֆիլմը նկարահանվել է Վրաստանի, ԱՄՆ-ի ու Հայաստանի համագործակցությամբ։
28-ամյա ռեժիսոր Գեորգի Սիխարուլիձեն ծնունդով Թբիլիսիից է։ Ստացել է բակալավրի աստիճան Նյու Յորքի համալսարանում, հիմա ստանում է կինոռեժիսուրայի մագիստրոսի աստիճան Կոլումբիական համալսարանում։ «Կինոռեժիսուրա» ու «Հոգեվերլուծություն ու կինո» թեմաներով դասախոսություններ է կարդում Հյուսիս-արեւմտյան ու Կոլումբիական համալսարաններում։
Վրաստանի հետ միասին կինոփառատոնի մրցութային ծրագիր են մտել Ռուսաստանի, Իրանի, Լիբանանի, Կուբայի, Եգիպտոսի, Հարավային Կորեայի, Հնդկաստանի, Նոր Զելանդիայի, Ավստրալիայի, Կանադայի ու եվրոպական երկրների ռեժիսորները ֆիլմերը։
