2016-ի հուլիսի 29-ի լույս 30-ի գիշերը Էրեբունիում լուրջ հանցագործություններ են տեղի ունեցել ու կարեւոր է, որ մեղավորները պատասխանատվության կանչվեն։ Այս մասին ասել է Հայաստանում ԱՄՆ արտակարգ ու լիազոր դեսպան Ռիչարդ ՄԻլսը Հայ-Ամերիկյան առեւտրային պալատում միջոցառման շրջանակում իր ելույթի ժամանակ՝ խոսելով Հայաստանում ԱՄՆ դեսպանատան ծրագրերի ու գործունեության ուղղությունների մասին։
Նրա խոսքով անցած տարվա հուլիսին Էրեբունիում 15-օրյա դիմակայության ժամանակ Հայաստանի իրավապահները կարողացել են ապահովել լավ հավասարակշռություն բնակչության անվտանգության ապահովման հարցում ու իրադարձությունների վայրի շուրջ՝ միաժամանակ ապահովելով խաղաղ հանրահավաքներ անցկացնելու՝ ՀՀ քաղաքացիների իրավունքի իրականացումը։ «Այդուհանդերձ, մեզ համար մտահոգիչ էին ոստիկանության կողմից անզեն ցուցարարների ու լրագրողների հանդեպ ուժի անհամաչափ կիրառման մասին հավաստի հաղորդագրությունները։ Այն ժամանակ մենք ներկայացրեցինք մեր մտահոգությունը՝ նշելով, որ նման գործողությունները խախտում են ազատ մամուլի իրավունքը ու Հայաստանի քաղաքացիների ազատ ինքնաարտահայտման ու հանրահավաքներ անցկացնելու իրավունքը։ Չնայած որոշ ոստիկաններ պատժվել են այդ օրվա գործողությունների համար, սակայն կարելի՛ էր ավելին անել ու պե՛տք էր ավելին անել»,- շեշտել է Ռիչարդ Միլսը։
